Կառպաչչո՝ տավարի մսից, առողջ ապրելակերպի ալյուր և էլեկտրաշարժակով կահույք. ինչով կզարմացնի Բելառուսը Երևանի ցուցահանդեսին

Սեպտեմբերի 16-18-ը Երևանում անցկացվող Armenia Expo միջազգային ցուցահանդեսին ներկայացվելու է նաև Բելառուսի մեծածավալ էքսպոզիցիան։ Ինչպես հայտնում են ՀՀ-ում Բելառուսի դեսպանությունից, ցուցադրմանը կմասնակցեն գործունեության տարբեր բնագավառների 19 խոշոր ձեռնարկություններ, որոնք հայ սպառողին կներկայացնեն լավագույն արտադրանքն ու նորույթները։ Բելառուսական տաղավարի ընդհանուր ցուցահանդեսային մակերեսը կկազմի 112 քմ։

Բելառուսի տաղավարում կենտրոնական տեղը կզբաղեցնեն Սննդի արդյունաբերության բելառուսական պետական կոնցեռնի՝ «Բելգոսպիշչեպրոմ»-ի ձեռնարկությունները՝ հրուշակեղենի գործարաններ «Կոմունարկա», «Կրասնիյ պիշչևիկ», «Սպարտակ», «կաթնային» ընկերություն «Բաբուշկինա կռինկա», գարեջրի ածիկ արտադրող «Բելսոլոդ», «ՄԻՆՍԿ-ԿՐԻՍՏԱԼ» հոլդինգ, Մինսկի մարգարինի գործարան և Սլուցկի շաքար-ռաֆինադի գործարան։

Ներկայացված կլինեն նաև Գրոդնոյի մսի կոմբինատը, Կալինկովիչի կաթնամթերքի կոմբինատը, «ԿիմաԲել», Ծանր դրոշմահատուցման դարբնոցային գործարանը, «Լիդահացամթերք», Մինսկի հացամթերքի կոմբինատը, «Մինսկի տոհմաբուծական ձեռնարկությունը», Մոզիրի սպիրտ-օղու գործարանը, «Օլսա», Սմորգոնի հացամթերքի կոմբինատը։

Բելառուսի էքսպոզիցիան կառանձնանա ներկայացված ապրանքների բազմազանությամբ։

Սննդամթերքի հատվածը կներառի մսամթերքի և կաթնամթերքի լայն տեսականի (կաթ, թթվասեր, կարագ, կաթնաշոռ, պանիր, երշիկեղեն, նրբերշիկներ, ապխտած միս և այլն), հրուշակեղեն (շոկոլադ, քաղցրավենիք, թխվածքաբլիթներ, շոկոլադե սալիկներ), ալյուր և ալյուրի խառնուրդներ, ալկոհոլային խմիչքներ (թուրմեր, բալզամներ, օղի): Սպասվում է նորույթների ցուցադրություն՝ 45% «Էմենտալեր» պանիր Կալինկովիչի կաթնամթերքի կոմբինատից, միկրոնիզացված հացահատիկի ալյուր Սմորգոնի հացամթերքի կոմբինատից, կառպաչչո տավարի մսից Գրոդնոյի մսի կոմբինատից, դառը թուրմ Մոզիրի սպիրտ-օղու գործարանից:

Արդյունաբերական ապրանքների բաժնում կցուցադրվեն Ծանր դրոշմահատոցման դարբնոցային գործարանի արտադրանքը՝ կռածոներ և դրոշմահատոցներ, ավտոմեքենաների եզրակալների լոնժերոններ, անիվների շրջանակներ տարբեր բեռնաբարձության հանքարդյունաբերական ինքնաթափ մեքենաների համար:

«Օլսա» ընկերությունը կներկայացնի փայտամշակման արտադրանք և կենցաղային իրեր՝ կահույք (քեմփինգի, տեռասի, այգու և տան, բժշկական հաստատությունների համար), բացօթյա մարզասարքեր, էլեկտրական պոմպեր և փոքր չափի փայտամշակման հաստոցներ։ Ընկերության նորույթներն են՝ «լոֆթ» ոճի ժամանակակից կահույք և հիվանդանոցների համար նախատեսված էլեկտրական և հիդրավլիկ շարժակով բժշկական մահճակալներ:

Գիտատեխնիկական նորարարությունների շարքից կներկայացվեն «Մինսկի տոհմաբուծական ձեռնարկության» նյութերն ու մշակումները՝ արտադրող ցուլերի խորը սառեցված սերմնահեղուկ, ցեղական ցուլերի սաղմեր, խոշոր եղջերավոր կենդանիների արհեստական բեղմնավորման համար նախատեսված նյութեր։

Բելառուսի տաղավարը կտեղակայվի Կարեն Դեմիրճյանի անվան մարզահամերգային համալիրի ցուցահանդեսային գոտու կենտրոնում, տաղավարի համարը՝ AE10-A: Երևանում անցկացվող Armenia Expo միջազգային ցուցահանդեսին Բելառուսի էքսպոզիցիայի կազմակերպիչը Բելառուսի Առևտրաարդյունաբերական պալատի «Բելինտերէքսպո» ցուցահանդեսային ձեռնարկությունն է։ Էքսպոզիցիան կանցկացվի Հայաստանի Հանրապետությունում Բելառուսի Հանրապետության դեսպանության աջակցությամբ և ակտիվ մասնակցությամբ։