Գրեթե 30 քաղաքական գործիչ լքել է Մեծ Բրիտանիայի կառավարությունը Ջոնսոնի հետ սկանդալի պատճառով
Մեծ Բրիտանիայի վարչապետ Բորիս Ջոնսոնի հետ կապված սկանդալի պատճառով վերջին 24 ժամում Մեծ Բրիտանիայի կառավարությունը լքել է արդեն 27 մարդ։ Ինչպես նշում են բրիտանացի քաղաքական մեկնաբանները, կաբինետի ղեկավարի համար ավելի ու ավելի դժվար կլինի պահպանել իր պաշտոնը ներկա պայմաններում։ Այս մասին գրում է ՏԱՍՍ գործակալությունը:
Ինչպես նշում է Daily Mail-ը, այժմ նույնիսկ բարձրաստիճան նախարարներն են Ջոնսոնին խնդրում ինքնակամ հրաժարական տալ:
Երեքշաբթի օրը Ջոնսոնը Sky News-ին տված հարցազրույցում ներողություն էր խնդրել ընտրողներից Քրիս Փինչերի վերջին և անցյալ նշանակումների համար։ Միաժամանակ վարչապետը չի մեկնաբանել մամուլում հայտնված այն տեղեկությունը, թե տեղյակ է Փինչերի ոչ պատշաճ պահվածքին, և նույնիսկ կատակել է կառավարության իր գործընկերների հետ։ Գրեթե անմիջապես այն բանից հետո, երբ Ջոնսոնը ներողություն է խնդրել, ֆինանսների նախարար Ռիշի Սունակը և առողջապահության նախարար Սաջիդ Ջավիդը հրաժարական են տվել: Ավելի ուշ կառավարության մյուս անդամները հետեւել են օրինակին, իսկ մի շարք պահպանողական պատգամավորներ հայտարարել են վարչապետի նկատմամբ վստահությունը կորցնելու մասին։
