Էրդողանը Կոնգոյի Դեմոկրատական Հանրապետությունից մեկնել է Սենեգալ
Թուրքիայի նախագահ Ռեջեփ Թայիփ Էրդողանը երկուշաբթի օրը Կոնգոյի Դեմոկրատական Հանրապետությունից մեկնել է Սենեգալ՝ աֆրիկյան երկրներ կատարած այցի շրջանակներում: Հայտնում է թուրքական «Անադոլու» լրատվական գործակալությունը:
Այցի շրջանակներում Թուրքիայի նախագահին ուղեկցում են արտաքին գործերի նախարար Մևլութ Չավուշօղլուն, ներքին գործերի նախարար Սուլեյման Սոյլուն, ազգային պաշտպանության նախարար Հուլուսի Աքարը, առևտրի նախարար Մեհմեդ Մուշը, տրանսպորտի և ենթակառուցվածքների նախարար Ադիլ Կարաիսմաիլօղլուն, երիտասարդության և սպորտի նախարար Մեհմեդ Մուհարեմ Քասապօղլուն։
Թուրքիայի ղեկավարի Սենեգալ այցի օրակարգում են բանակցություններ նախագահ Մակի Սալեմի հետ, մասնակցություն Թուրքիա-Սենեգալ գործարար համաժողովին, ինչպես նաև 50 հազար հանդիսատեսի համար նախատեսված Օլիմպիական մարզադաշտի բացումը, որը աֆրիկյան երկրում կառուցվել է թուրքական ընկերություններից մեկի կողմից։
Նախատեսվում է ստորագրել մի շարք միջկառավարական համաձայնագրեր։
Սենեգալից Թուրքիայի ղեկավարը կմեկնի Գվինեա-Բիսաու։
