Պենտագոնը չի բացառել ամերիկյան ուժերն Ուկրաինա ուղարկելու հնարավորությունը
Պենտագոնը չի բացառել, որ ԱՄՆ լրացուցիչ ուժերը Եվրոպայում կարող են ուղղվել դեպի Ուկրաինա՝ աջակցելու տարհանմանը: Այս մասին փետրվարի 2-ին հրավիրված ճեպազրույցի ժամանակ հայտարարել է Պենտագոնի ներկայացուցիչ Ջոն Կիրբին:
Պատասխանելով հարցին, թե արդյոք ամերիկյան ուժերը կարող են հնարավոր տարհանմանն աջակցել, Կիրբին ասել է. «Մեր ուժերը պատրաստ են տարբեր առաքելություններ իրականացնել, և նրանք պատրաստ կլինեն տարբեր պարտականությունների կատարմանը»:
Նա ընդգծել է, որ ամերիկացի զինվորականները չեն մասնակցելու Ուկրաինայում ռազմական գործողություններին: Այդուհանդերձ, նա հրաժարվել է այլ մանրամասներ հաղորդել ամերիկյան ուժերի առաքելության ու Եվրոպա ուղարկելու հստակ ժամանակացույցի վերաբերյալ:
