Իլոն Մասկն ուսանողին առաջարկել է 5000 դոլար՝ իրեն հետևող բոտը հեռացնելու համար
Իլոն Մասկը 19-ամյա ամերիկացի ուսանող Ջեք Սուինիին առաջարկել է հինգ հազար դոլար՝ հեռացնելու համար բոտը, որը հետևում է միլիարդատիրոջ անձնական ինքնաթիռի գտնվելու վայրին և դրա մասին տեղեկատվությունը տեղադրում Twitter-ում։ Այս մասին հայտնում է Protocol հրատարակությունը։
Twitter-ի @ElonJet հաշիվը Sweeney-ին պատկանող 15 հաշիվներից մեկն է, որոնք հետևում են աշխարհի հայտնի մարդկանց շարժումներին: Հաշիվներից յուրաքանչյուրը ղեկավարվում է բոտերի կողմից, որոնք վերլուծում են հայտնի մարդկանց մասնավոր ինքնաթիռների գտնվելու վայրը և տեղադրում դրանք սոցիալական ցանցում: Բացի Մասկից, ուսանողական հաշիվները հետևում են նաև Բիլ Գեյթսի և Ջեֆ Բեզոսի շարժումներին, սակայն Tesla-ի և SpaceX-ի հիմնադրին նվիրված հաշիվը մնում է ամենահայտնին նրանցից՝ 83,000 բաժանորդով:
Սուինիի խոսքով՝ Մասկի առաջարկն իրեն Twitter-ում անձնական հաղորդագրություններով է հասել անցյալ աշնանը։ Նամակում միլիարդատերը խնդրել է հեռացնել բոտը՝ ասելով, որ դա «անվտանգության վտանգ է», և հավելել, որ «իրեն դուր չի գալիս գնդակահարվելու գաղափարը»: Սուինին միլիարդատիրոջն ասել է, որ բոտի հեռացումը կարժենա իր Tesla Model 3-ը:
Մասկը հարցրել է Սուինիին, թե որքան է նա վաստակում իր հաշիվներից։ Նա պատասխանել է, որ դրանցից իր եկամուտն ընդհանուր առմամբ չի գերազանցում ամսական 20 դոլարը։ Հետո միլիարդատերն առաջարկել է իր հինգ հազար դոլար գումարը՝ հաշիվը ջնջելու համար։ Մասկի խոսքով՝ այս կերպ Սուինին կօգնի իրեն, որպեսզի «խելագարները» չհետևեն նրա գտնվելու վայրը։ Ի պատասխան՝ ուսանողը խնդրել է պարգևավճարը հասցնել 50 հազար դոլարի․ Սուինին նշել է, որ դա «մեծ աջակցություն կլինի քոլեջում սովորելու համար և, հավանաբար, թույլ կտա նրան գնել մեքենա, գուցե նույնիսկ Model 3»:
Միլիարդատերը պատասխանել է, որ կմտածի այդ մասին, սակայն այդ ժամանակվանից նա այլևս չի շփվում ուսանողի հետ։ Ինքը՝ Սուինին, նշել է, որ այնքան էլ չի տխրել, քանի որ @ElonJet-ը և այլ աքաունթները նրան շատ օգուտ են տվել։ Մասնավորապես, ուսանողը նշել է, որ շատ բաժանորդներ է ձեռք բերել սոցցանցերում, սովորել է ծրագրավորել, ինչպես նաև որոշ ժամանակ UberJets-ում աշխատել է՝ որպես հավելվածների մշակող։ Բացի այդ, Սուինին բացատրել է, որ ուրախ է Մասկի հետ անձնական հաղորդագրություններով զրուցելու համար, քանի որ երկար ժամանակ իրեն երկրպագու է համարում։
Սիրարփի Աղաբաբյան
