Տավուշի մարզի բնակիչը ձերբակալվել է՝ նույն մարզի մեկ այլ բնակչի ծանր մարմնական վնաս պատճառելու կասկածանքով
ՀՀ քննչական կոմիտեի Տավուշի մարզային քննչական վարչությունում ՀՀ քրեական օրենսգրքի 112-րդ հոդվածի 1-ին մասի հատկանիշներով հարուցված քրեական գործով իրականացվում են քննչական և դատավարական այլ գործողություններ՝ Տավուշի մարզի բնակչին ծանր մարմնական վնաս պատճառելու դեպքի հանգամանքները պարզելու ուղղությամբ:
2022թ. հունվարի 15-ին՝ ժամը 03:35-ին, ՀՀ ոստիկանության Նոյեմբերյանի բաժնում քաղաքացուց ահազանգ էր ստացվել այն մասին, որ Նոյեմբերյան քաղաքի Տերյան փողոցում գտնվող տանը գող կա:
Ձեռնարկված միջոցառումների արդյունքում պարզվել է, որ նույն օրը՝ ժամը 03:10-ի սահմաններում, Տավուշի մարզի Դեբեդավան բնակավայրի բնակիչը, ցանկապատի վրայով մուտք է գործել Նոյեմբերյան քաղաքի Տերյան փողոցում գտնվող տուն, ում նույն տան բնակիչը նկատել է: Հասկանալով, որ իրեն նկատել են՝ Դեբեդավան բնակավայրի բնակիչը ցատկել է պատշգամբից և դիմել փախուստի, որից հետո նշված տանտերը հետապնդել է նրան և փողոցում իր անվամբ հաշվառված «Սայգա-ՄԿ» տեսակի որսորդական ակոսափող հրազենից մեկ անգամ կրակել է տղամարդու կոնքի հատվածին՝ պատճառելով կյանքին վտանգ սպառնացող ծանր մարմնական վնաս:
Նախաքննության ընթացքում կատարվել է դեպքի վայրի զննություն, վերցվել է կրակված գնդակի մեկ պարկուճ, կատարվել են առգրավումներ, նշանակվել են դատաբժշկական, դատաձգաբանական փորձաքննություններ:
Նոյեմբերյան քաղաքի բնակիչը ձերբակալվել է:
Նախաքննությունը շարունակվում է:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
