«Կրակոցները սկսվել են այսօր ժամը 14։20-ից, դրանք հայկական կողմը լռեցրել է ժամը 15։00-ի կողմերը». Վերին Շորժայի գյուղապետ
Գեղարքունիքի մարզի Վերին Շորժայի ուղղությամբ տեղակայված ադրբեջանական դիրքերում թշնամու զինված ուժերի ներկայացուցիչները դիմել են հերթական սադրանքին և կրակ են բացել հայկական դիրքերի ուղղությամբ։
168.am–ի հետ զրույցում Վերին Շորժայի ղեկավար Արտյոմ Երանոսյանն ասաց, որ կրակոցները լսել են նաև գյուղում։
«Կրակոցները սկսել են այսօր ժամը 14։20-ից, դրանք հայկական կողմը լռեցրել է ժամը 15։00-ի կողմերը։ Կապ եմ հաստատել մեր դիրքապահների հետ, ասել են, որ այժմ ամեն ինչ կարգին է, վիրավորներ չկան, նորմալ է»,- նշեց Արտյոմ Երանոսյանը։
Միաժամանակ նա տեղեկացրեց, որ այս տարի թշնամու կողմից սա արդեն երկրորդ նմանատիպ սադրանքն է։
«Թշնամին փորձել էր նման սադրանքի դիմել դեկտեմբերի 31-ի կեսգիշերին, մի քանի անգամ կրակելուց հետո, մերոնք կրկին լռեցրել էին։ Փառք Աստծո, այս պահին ամեն ինչ նորմալ է»,- հավելեց նա։
Հիշեցնենք, որ 2020 թվականի դեկտեմբերի 18-ից հետո, երբ Սյունիքի ու Գեղարքունիքի մարզերում Նիկոլ Փաշինյանի որոշմամբ հայ զինվորները հետ քաշվեցին իրենց զբաղեցրած դիրքերից, հարակից բոլոր բնակավայրերն ու գյուղերը հայտնվեցին թշնամու թիրախում։
