«Ահավոր էր գիտակցել, որ պետական կառավարման համակարգից պետք է աստիճանաբար հանել Արցախ բառը, մոռանալ Արցախն ու արցախցուն». Անի Բաբայան

168.am-ն օրերս անդրադարձել էր ՀՀ Աշխատանքի և սոցիալական հարցերի նախարարության Միասնական սոցիալական ծառայության բժշկասոցիալական փորձաքննության և աջակցող միջոցներով վարչության գլխավոր մասնագետ Անի Բաբայանի ահազանգին. վարչությունում հրաժարվել էին վերափորձաքննել Արցախի Հանրապետության 9 ամսական երեխային: Խնդրի մասին ահազանգից հետո Անի Բաբայանի նկատմամբ սկսվել էր ծառայողական քննություն, որն ավարտվել էր որոշմամբ՝ կիրառել «ծառայության դադարեցում կարգապահական տույժը»:

Նախարարության գլխավոր մասնագետը որոշել է դատարանում վիճարկել որոշումը, իսկ մինչ այդ՝ ֆեյսբուքյան գրառմամբ արձանագրել.«Ահա և վերջ…

2 ամիս մղած պայքարիս որոշ փուլեր ավարտվեցին։

Ահավոր էր գիտակցել, որ պետական կառավարման համակարգից պետք է աստիճանաբար հանել Արցախ բառը, մոռանալ Արցախն ու արցախցուն, խախտել նրանց իրավունքները, չխնայելով նույնիսկ փոքրիկին։ Պարզապես, այդ ամենը պետք է արվեր անաղմուկ, իսկ ես` դա չէի կարող թույլ տալ, որովհետև ես ՀԱՅ եմ։

Առաջին իսկ օրվանից աշխատանքից հեռացումով սպառնալով, սիրաշահելով, ծանոթ, մտերիմ միջնորդներ ուղարկելով, ճնշումներ գործադրելով իմ հանդեպ` միևնույն է, ես անդրդվելի էի, իհարկե հաջողության հասնելու շանսերս գնահատելով 0,01%։

Եվ ահա, ուրախ եմ արձանագրել, որ պայքարս տվեց որոշ դրական արդյունք և համագործակցությունն Արցախի հետ շարունակվելու է, այն էլ` հենց վաղը, ճիշտ է, մի փոքր այլ ձևաչափով, բայց կարևորը` արցախցիներն այս պահին մենակ չեն։
Անդրդվելի էին նաև իրենք և …

Թեպետ, կենսագրությանս և իմ ողջ աշխատանքային գործունեության մեջ գրանցել եմ միայն հաջողություններ, միևնույն է, անկախ ելքից` սա համարելու եմ իմ անցած կարևորագույն ուղիներից մեկը, խոչընդոտներով լի ուղի` որն անցա վստահ, հպարտ, արժանապատիվ, աննկուն, ուղի, որը դեռ շարունակվելու է։

Իսկ այս պահին, այս փուլի համար ազդարարենք վերջ։

Յուրաքանչյուր վերջ, ինչ որ մի նոր բանի սկիզբն է»։