ՔՊ-ն ԱԺ պաշտպանության հանձնաժողովի նախագահի տեղակալի պաշտոնում թեկնածու կառաջադրի
ԱԺ Պաշտպանության և անվտանգության հարցերի մշտական հանձնաժողովն այսօր կրկին հրավիրել էր արտահերթ նիստ՝ հանձնաժողովի նախագահի տեղակալ ընտրելու համար։
Հանձնաժողովի նիստին երկու ընդդիմադիր՝ «Հայաստան» և «Պատիվ ունեմ» խմբակցություններից որևէ պատգամավոր չէր մասնակցում։ Իսկ «Քաղաքացիական պայմանագիր» խմբակցությունից մասնակցում էին հանձնաժողովի նախագահ Անդրանիկ Քոչարյանը, Արմեն Խաչատրյանը և Գագիկ Մելքոնյանը։
«Այսօր կրկին ՔՊ-ի կողմից բացակայում է հանձնաժողովի նախագահի տեղակալի թեկնածուի առաջարկը։ Նիստը համարում ենք ավարտված։ Կանոնակարգ օրենքի պահանջով կշարժվենք, մինչև ՔՊ-ի կողմից ունենանք հանձնաժողովի նախագահի թեկնածու»,- նշեց Անդրանիկ Քոչարյանը։
Հիշեցնենք, որ «Հայաստան» խմբակցությունը հանձնաժողովի նախագահի թեկնածու էր առաջադրել Արթուր Ղազինյանին, սակայն ՔՊ-ն տարբեր պատճառներով նրա թեկնածությանը դեմ էր քվեարկում՝ առաջարկելով առաջադրել այլ թեկնածու, ինչին «Հայաստան» խմբակցությունը համաձայն չէ։
Նախորդ արտահերթ նիստում Անդրանիկ Քոչարյանը հայտարարել էր, թե որպես բարի կամքի դրսևորում՝ ՔՊ-ն հանձնաժողովի նախագահի տեղակալի թեկնածու չի առաջադրի, բայց եթե հաջորդ անգամ ընդդիմությունը թեկնածու չառաջադրի, ապա իրենք կառաջադրեն իրենց թեկնածուին։
