Սոմալիի վարչապետը հայտնել է իշխանությունը տապալելու փորձի մասին
Սոմալիում դեկտեմբերի 27-ին փորձ է արվել տապալել դաշնային կառավարությունը, որին աջակցել է նախագահ Մուհամեդ Աբդուլահի Մոհամեդը։ Այս մասին ժողովրդին ուղղված իր ուղերձում հայտարարել է Սոմալիի վարչապետ Մուհամեդ Հուսեյն Ռոբլեն։
«Բաց փորձ է արվել տապալել կառավարությունը, սահմանադրությունը և գործող օրենքները»,- նշել է նա:
Վարչապետն ընդգծել է, որ Սոմալիի նախագահի այս գործողություններն ուղղված են եղել պաշտոնավարման ժամկետի ավարտից հետո պետության ղեկավարի պաշտոնում մնալուն։ «Մուհամեդն այժմ ամեն ինչ անում է երկրում ընտրությունները խաթարելու և ապօրինի կերպով իր պաշտոնում մնալու համար»,- ասել է վարչապետը։
«Իմ կառավարությունն այժմ պատասխանատու է երկրի ղեկավարման համար: Անվտանգության ուժերի ղեկավարությանը հրամայում եմ ենթարկվել միայն իմ հրամաններին, ոչ թե երկրի նախագահին»,- ասել է Ռոբլեն: Վարչապետն ընդգծել է, որ այն զինվորականները, ովքեր անտեսում են վարչապետի հրամանները, պատասխանատվության կենթարկվեն։
Նա նաև կոչ է արել Մուհամեդին անհապաղ հեռանալ նախագահի պաշտոնից։ «Թողեք պետության ղեկավարի պաշտոնը և ղեկավարեք ձեր վերընտրվելու քարոզարշավը»,- ասել է նա։
