«Անորակ հրթիռների» գործով անցնող ՀՀ ԶՈՒ ավիացիայի վարչության պաշտոնյաներից մեկին բաց են թողել

168.am-ի տեղեկություններով, «անորակ հրթիռների» գործով անցնող ՀՀ զինված ուժերի ավիացիայի վարչության գլխավոր ինժեներ Վլադիմիր Բաբայանին ազատ են արձակել, իսկ նույն վարչության ավիացիոն տեխնիկական ունեցվածքի ծառայության պետ Արտյոմ Համբարյանը կալանքի տակ է:

Հոկտեմբերի 29-ին 168.am-ը գրել էր, որ «անորակ հրթիռների» գործով ԱԱԾ-ն ձերբակալել է ՀՀ զինված ուժերի ավիացիայի վարչության ավիացիոն տեխնիկական ունեցվածքի ծառայության պետ Արտյոմ Համբարյանին և ավիացիայի վարչության գլխավոր ինժեներ Վլադիմիր Բաբայանին:

Նոյեմբերի 2-ին մենք գրավոր հարցում էինք ուղարկել ուժային կառույցին՝ պարզելու, թե «անորակ հրթիռների գործով» ինչո՞ւմ են մեղադրում ՀՀ զինված ուժերի ավիացիայի վարչության ավիացիոն տեխնիկական ունեցվածքի ծառայության պետին և գլխավոր ինժեներին, և արդյո՞ք կան ՊՆ այլ պաշտոնյաներ կամ աշխատակիցներ այս գործով անցնող, որոնց մասին ԱԱԾ-ն ևս դեռ չի հայտնել:

Նոյեմբերի 8-ին մեր հարցադրմանն ի պատասխան՝ ԱԱԾ-ի ուղարկած գրության մեջ նշվում էր, որ մեր հարցադրումների պատասխանները նախաքննական գաղտնիք են պարունակում:

Հավելենք, որ նոյեմբերի 3-ին ՀՀ պաշտպանության նախկին նախարար Դավիթ Տոնոյանի փաստաբանական խումբն իր տարածած հայտարարության մեջ անդրադարձել էր ՀՀ զինված ուժերի ավիացիայի վարչության ավիացիոն տեխնիկական ունեցվածքի ծառայության պետ Արտյոմ Համբարյանին և ավիացիայի վարչության գլխավոր ինժեներ Վլադիմիր Բաբայանին:

«Օրերս տեղեկացանք, որ Դավիթ Տոնոյանի վերաբերյալ քրեական գործով ԱԱԾ-ն ձերբակալել է նույն գործով մինչ այդ վկայի դատավարական կարգավիճակով հարցաքննված ՀՀ ՊՆ ավիացիայի վարչության ավիացիոն տեխնիկական ունեցվածքի ծառայության պետ Արտյոմ Համբարյանին և ավիացիայի վարչության գլխավոր ինժեներ Վլադիմիր Բաբայանին: Բարձրաստիճան այս երկու սպաները քրեական գործով տվել էին գործի մյուս նյութերի հետ հակասության մեջ չգտնվող, Դավիթ Տոնոյանի մեղադրանքը հերքող ցուցմունքներ: Պաշտպանության կողմն ունի նաև այլ տեղեկություններ նշված երկու անձանց ձերբակալելու «առիթների» վերաբերյալ, որոնք այս պահին հանրայնացնելը նպատակահարմար չենք համարում»,- նշված էր Տոնոյանի փաստաբանական խմբի հայտարարության մեջ:

Ի դեպ, ՊՆ-ին մոտ կանգնած մեր աղբյուրները դեռ այն ժամանակ մեզ վստահեցրել էին, որ, մասնավորապես, ավիացիայի վարչության գլխավոր ինժեներ Վլադիմիր Բաբայանը պարկեշտ անձնավորություն է, և չէր կարող, այսպես ասած, մասնագիտական անբարեխղճություն թույլ տալ:

Ստացվում է՝ սրանում իշխանությունները միայն 2 ամիս հետո՞ են համոզվել: Ըստ էության, այս փաստը հուշում է «անորակ հրթիռների» գործի փակուղային ճակատագրի մասին:

Այս գործով են անցնում ՀՀ զինված ուժերի ավիացիայի վարչության նախկին պետ Ավետիք Մուրադյանը, ԳՇ պետի արդեն նախկին տեղակալ Ստեփան Գալստյանը, քանի որ օրերս ՀՀ նախագահի հրամանագրով գեներալն ազատվել է զբաղեցրած պաշտոնից:

Ռազմամթերքի մատակարարման չարաշահմանն առնչվող քրեական գործով կալանավորված են պաշտպանության նախկին նախարար Դավիթ Տոնոյանն ու զենքի մատակարար Դավիթ Գալստյանը (Պատրոն Դավիթ)։