«Hayk Marutyan ջան, հետդ եմ, քեզ հիմա դժվար ա, քանի որ «ոհմակ» չունես քեզ սատարող». Իզաբելլա Աբգարյան
Երևանի ավագանու «Իմ Քայլը» խմբակցության անդամ Իզաբելլա Աբգարյանը ֆեյսբուքյան գրառմամբ իր աջակցությունն է հայտնել քաղաքապետ Հայկ Մարությանին.
«Hayk Marutyan ջան, հետդ եմ:
Նիստ չի եղել, որ մի թերություն չասեմ, բայց ես անարդարություն չեմ հանդուրժի:
Ամենածանր ճգնաժամերը դու ես լուծել, ամենաբարդ խնդիրներին լուծումներ գտել:
Ավագանին միայն պատին էր դնում հասածդ նվաճումները ու ծափեր կորզում:
Իսկ երբ դու ճկռում էիր խնդիրների, ճգնաժամի ժամանակ, երբ երևանցուն պետք էր պատասխան տալ, թե ինչու ա վատ ու երբ լավ կլինի, մի քանի հոգի էին օգնում խաչդ կրել:
Չկոտրվես: Գիտեմ, որ դու գործի մարդ ես, խորապես անկուսակցական ու քեզ հիմա դժվար ա, քանի որ «ոհմակ» չունես քեզ սատարող:
Բայց դու ավելին ունես: Մտի նայի երևանցիների արձագանքը: Քո արածը գնահատողը կգնահատի»,- գրել է նա։
Հիշեցնենք, որ Երևանի ավագանու «Իմ քայլը» խմբակցությունը Նիկոլ Փաշինյանի հրահանգով Հայկ Մարությանին անվստահություն հայտնելու գործընթաց է սկսել։ Իհարկե, «Իմ քայլը» խմբակցության ավագանու անդամներից ոչ բոլորն են կողմ, որ Հայկ Մարությանը դադարեցնի իր պաշտոնավարումը։
Դեկտեմբերի 13-ին Նիկոլ Փաշինյանի ընտանեկան «Հայկական ժամանակ» թերթը Մարությանին մեղադրել էր «հեղափոխությանը դավաճանելու» մեջ գրել էր, թե տեղեկություններ են շրջանառվում, որ պատերազմի ավարտից հետո Հայկ Մարությանը Սեյրան Օհանյանի միջնորդությամբ հանդիպել է Ռոբերտ Քոչարյանի հետ:
Ազգային ժողովի «Հայաստան» խմբակցության պատգամավոր Արամ Վարդևանյանը, իսկ այսօր էլ Մարությանի խոսնակը հերքեցին, թե Երևանի քաղաքապետ Հայկ Մարությանը հանդիպել է ՀՀ երկրորդ նախագահ Ռոբերտ Քոչարյանին։
Իշխանամերձ լրատվամիջոցները Փաշինյանի ընտանեկան թերթի վերոնշյալ հրապարակումից անմիջապես հետո սկսեցին հարձակում գործել իրենց երբեմնի թիմակցի` քաղաքապետի դեմ: Երևանի ավագանու «Իմ քայլը» խմբակցությունը նրան անվստահություն հայտնելու գործընթաց է սկսել:
Իշխանամերձ այդ լրատվամիջոցներից մեկի տեղեկություններով էլ՝ վաղը Նիկոլ Փաշինյանը հանդիպում է ունենալու ավագանու «Իմ քայլը» խմբակցության հետ` քննարկելու այդ հարցը:
