«Բայրաքթարներն են ոչնչացրել մեր զավակներին, սա պարոն Լիպարիտյանին ոչինչ չի՞ հուշում». Արծվիկ Մինասյան
ՀՀ Առաջին նախագահի գլխավոր խորհրդական, հատուկ հանձնարարությունների գծով դեսպան Ժիրայր Լիպարիտյանն այսօր խորհրդարանում փակ դռների հետևում հանդիպում էր իշխող «Քաղաքացիական պայմանագիր» խմբակցության պատգամավորների հետ: Հանդիպումից առաջ, սակայն, լրագրողները մի քանի հարցի պատասխան ստանալու հնարավորություն ունեցել էին։
Հարցերից մեկն էլ վերաբերում էր մեկ օր առաջ արված Թուրքիայի արտգործնախարարի հայտարարությանը, թե Հայաստանի հետ հարաբերությունների կարգավորման համար Թուրքիան հատուկ ներկայացուցիչ կնշանակի։ Ժիրայր Լիպարիտյանն առհասարակ հայ-թուրքական հարաբերությունների վերաբերյալ հետևյալ տեսակետը հայտնեց. «Ինքս միշտ համաձայն եմ եղել, որ մեր հարաբերությունները հարևանների հետ նորմալանան, բոլորի հետ։ Այստեղ ես մի քանի հարցազրույց եմ տվել և ավելին ասելիք չունեմ։ Առավոտյան Թուրքիայի արտգործնախարարի հայտարարությունը պատահմամբ եմ կարդացել, հիմա ի՞նչ ասեմ»։
Լրագրողների հարցերին պատասխանելիս դիվանագետն անդրադարձել էր նաև «Հայաստան» խմբակցության քարտուղար Արծվիկ Մինասյանի հայտարարությանը, թե ի՞նչ բարիդրացիական հարաբերություններ պետք է հաստատել այն երկրի հետ, որն ուզում է քեզ մորթել, Ժիրայր Լիպարիտյանն ինքը միջնորդավորված հարց էր ուղղել Արծվիկ Մինասյանին. «30 տարի է, ասում է՝ մորթվելու ենք, մորթվե՞լ է»։
168.am-ի հետ զրույցում Արծվիկ Մինասյանն էլ հակադարձեց Ժիրայր Լիպարիտյանին, նախ նշեց, որ Թուրքիայի հետ հարաբերությունների վերաբերյալ Ժիրայր Լիպարիտյանի տեսակետն ու ցանկությունը նոր չեն։
«Խնդիրն այն է, որ երբ պարոն Լիպարիտյանը խոսում է 30 տարվա մասին, ապա այն 30 տարիներին, երբ Հայաստանն ավելի ուժեղ էր, Արցախի հետ միասին, ինչո՞ւ Թուրքիան առանց նախապայմանների չէր գնում հարաբերությունների կարգավորման։ Երբ Հայաստանի դռները բացում են թուրքի առաջ, ստացվում է, որ այս մարդիկ չեն հասկանում ադրբեջանաթուրքական սպառնալիքը՝ մեր երկրի ու պետականության գլխին ծառացած։ Կամ՝ երբ օգտագործում են բարիդրացիական հարաբերություններ եզրույթը, որը կազմված է բարի և դրացի, և եթե պարոն Լիպարիտյանի համար թուրքը բարի է ու դրացի, ես բացարձակապես այդ տեսակետը չեմ կիսում։ Եթե նրա համար ադրբեջանցին բարի է ու դրացի, այն ադրբեջանցին, որը հերոսացնում է սաֆարովներին, որը քաջալերում ու պետական մակարդակի է հասցրել հայերին ոչնչացնելը, մորթելը, ապա նշանակում է, որ նա հայ ժողովրդի ապագան այս տարածաշրջանում չի տեսնում»,- նշեց Արծվիկ Մինասյանը։
Միաժամանակ ընդդիմադիր պատգամավորն ընդգծեց, որ Ժիրայր Լիպարիտյանն իր հայտարարությունն անելիս հաշվի չի առնում, թե Արցախի 44-օրյա պատերազմի ժամանակ թուրք-ադրբեջանական տանդեմը որքան մարդ սպանեց, քանի քաղաքացիական անձանց սպանեց ու գլխատեց հայ զինվորների։
«Հաշվի չի առնում նաև, որ «բայրաքթարներն» են ոչնչացրել մեր բնակավայրերը, մեր զավակներին, սա պարոն Լիպարիտյանին ոչինչ չի՞ հուշում, սա պարոն Լիպարիտյանին գոնե զգուշավորության տեղ չի՞ տալիս։
Մենք չենք ասում, որ որևէ մեկի հետ որևէ հարաբերություն չպետք է լինի, բայց չի կարող այսպես թուլացած, նվաստացած, արժանապատվությունը գետնով տված իշխանության օրոք լինի։ Իսկ այսօր մեր երկիրն ու իշխանությունը մի վիճակի մեջ են, երբ թուրքական ու ադրբեջանական հարաբերությունները կառուցվում են բացառապես Հաայստանը ոչնչացնելու, իրենց համար սովորական վիլայեթ դարձնելու ու հայ ժողովրդին իրենց ծառայեցնելու հենքի վրա։ Բա արժանապատվության ու ազգայինի զգացողությունը ո՞ւր մնաց։ Եթե կլինի հարաբերության հաստատում առանց նախապայմանների, առանց որևէ խնդիր հարուցելու, որը կարող է վտանգել մեր պետականությանը, ապա ո՞վ է դրան դեմ։ Կամ մի հարաբերություն, որը չի կարող դուռ փակել մեր պատմական արդարության վերականգնման, Հայոց ցեղասպանության ճանաչման, դատապարտմանը, ապա նման հարաբերություն, իհարկե, պետք է հաստատել, որպեսզի հնարավորություն լինի նաև, որպեսզի թուրքերն իրենք ճանաչեն Ցեղասպանությունը։ Եթե պարոն Լիպարիտյանի պատկերացրած այս ամենը ընդամենը երազանք է և որևէ առնչություն չունի իրականության հետ, նշանակում է՝ նա նույնպես Հայաստանն ու հայ ժողովրդին չի պատկերացնում այս տարածաշրջանում»,- եզրափակեց Արծվիկ Մինասյանը։
