Հայկական երաժշտության մեջ Հայաստանի ոգին է. Մոնդելչին Երևանում կկատարի Թարիվերդիև և Ազնավուր
Հայաստան է ժամանել հանրաճանաչ իտալացի սաքսոֆոնահար Ֆեդերիկո Մոնդելչին, որը Երևանում կհնչեցնի Շառլ Ազնավուրի և Միքայել Թարիվերդիևի ստեղծագործությունների նոր մշակումները: Երեկոյին, որը տեղի կունենա հոկտեմբերի 26-ին «Արամ Խաչատրյան» համերգասրահում, ելույթ կունենա Հայաստանի պետական կամերային նվագախումբը (գեղարվեստական ղեկավար և գլխավոր դիրիժոր՝ Վահան Մարտիրոսյան): Ֆեդերիկո Մոնդելչին հանդես կգա և՛ որպես մենակատար, և՛ որպես դիրիժոր:
Մոնդելչին, որը բազմիցս ելույթներ է ունեցել Հայաստանում, հոկտեմբերի 22-ին լրագրողների հետ հանդիպմանն ասաց, որ Հայաստանն ու հայկական երաժշտությունը յուրահատուկ են: «Մանսուրյանի, Բաբաջանյանի ստեղծած կինոերաժշտությունն ունկնդրելիս միշտ լսում ես Հայաստանի ոգին: Երբ լսում ես Նինո Ռոտայի՝ Ֆելինիի ֆիլմերի համար գրած երաժշտությունը, հասկանում ես, որ այն երբեմն զարմացնում է, որ այն գեղեցիկ է, սակայն հայկական երաժշտությունը մշտապես արտացոլում է հենց հայ մարդու ոգին, լսում ես հայ մարդկանց ձայնը: Այդպիսին է նաև Ազնավուրի երաժշտությունը»,- ընդգծեց երաժիշտը՝ հատվածներ կատարելով Մանսուրյանի, Շառլ Ազնավուրի ստեղծագործություններից:
Ըստ Ֆեդերիկո Մոնդելչիի՝ Ազնավուրին և Թարիվերդիևին կապում է այն, որ նրանք երաժշտություն են գրել և՛ ֆիլմերի համար, և՛ հեռուստատեսության: Նա խոստովանեց, որ փոքր տարիքից է Ազնավուրի երկրպագուն եղել, անգամ երազել է սաքսոֆոնով կատարել նրա գործերը:
Հայաստանի պետական կամերային նվագախմբի տնօրեն Ֆելիքս Բաբուրյանն էլ շեշտեց, որ կարևոր են և՛ հոկտեմբերի 26-ի, և՛ հոկտեմբերի 28-ի համերգային ծրագրերը:
Հոկտեմբերի 26-ի համերգի ծրագիրն ընտրել են Ֆեդերիկո Մոնդելչիի հետ՝ ներառելով Շառլ Ազնավուրի, Միքայել Թարիվերդիևի, Նինո Ռոտայի գործերը: «Միշտ փորձում ենք որևէ հայ կոմպոզիտորի ստեղծագործություն ներկայացնել, իսկ Մոնդելչին ևս միշտ առաջարկում է կատարել հայ հեղինակների: Նա է իրականացրել գործիքավորումը: Համերգին նախատեսվում են նաև անակնկալներ, որոնց մասին դեռ չենք ցանկանում խոսել. հնչելու են գործեր, որոնք ծրագրում ներառված չեն»,-տեղեկացրեց նա:
Անդրադառնալով հոկտեմբերի 28-ին կայանալիք համերգին՝ Բաբուրյանն ասաց, որ այն ևս կանցկացվի «Արամ Խաչատրյան» համերգասրահում: Ելույթ է ունենալու իտալացի ակորդեոնահար Սիմոնե Զանտինին: Համերգը նվիրված է Աստոր Պիացոլայի 100-ամյակին: Ներկայացվելու են բացառապես Պիացոլայի գործերը:
