Գինու և կոնյակի գործարաններն այս պահին ո՞ր գնով են մթերում խաղողը
«Խաղողի գնի մթերման թեմայով այսօր մթերող ընկերությունների ներկայացուցիչների հետ խորհրդակցություն է տեղի ունեցել և պայմանավորվածություն է ձեռք բերվել տեխնիկական սորտի խաղողի մթերման գինը սահմանել 130 դրամ, որի մասին մթերող գործարանները պարտավորվել են հայտարարություն կատարել»,- այս մասին սեպտեմբերի 15-ին ԱԺ-ում կառավարության անդամների հետ հարցուպատասխանի ժամանակ հայտարարել էր փոխվարչապետ Սուրեն Պապիկյանը` անդրադառնալով խաղողի մթերման հետ կապված բողոքներին։
Նրա փոխանցմամբ՝ դրանից զատ, երկու շաբաթ առաջ Կառավարության որոշմամբ սուբսիդավորվող վարկային միջոցների շեմը սահմանվել է մինչև 4 միլիարդ դրամ:
Փոփոխություն կատարվել է նաև ժամկետների մեջ, և դա վերաբերում է ոչ միայն խաղողին, այլև այլ մշակաբույսերին՝ պահածոների համար նախատեսվող բանջարանաբոստանային կուլտուրաներին:
Նշենք, որ օրեր առաջ Տափերականի մոտ մի քանի գյուղերի բնակիչներ ճանապարհ էին փակել` ասելով, որ խաղողի մթերման շատ ցածր գին են իրենց առաջարկում այս տարի` ի տարբերություն նախորդ տարվա։ Օրինակ` այս տարի առաջարկում են 115 դրամ, իսկ գյուղացիները պահանջում էին՝ 140-150 դրամի սահմաններում մթերումը կատարվի։
«Հանդիպել եմ խաղողագործների հետ, այցելել «Պռոշյան» գործարան, և միակ խնդիրը, որի մասին բարձրաձայնել են, խաղողի գնի շուրջ է։ Խաղող մթերող գործարանների ներկայացուցիչների հետ պայմանավորվածության եկանք գնի շուրջ»,- ասել է Պապիկյանը։
168.am-ը փորձեց պարզել, թե գինու և կոնյակի գործարաններն այս պահին ո՞ր գնով են մթերում խաղողը:
Պռոշյանի կոնյակի գործարանից հայտնեցին, որ խաղող այս պահին մթերում են 130 դրամով:
Երևանի շապայն գինիների գործարանից էլ ասացին, որ այս պահին որոշված հստակ գին դեռևս չունեն:
«ՄԱՊ» փակ բաժնետիրական ընկերությունից էլ տեղեկացրեցին, որ խաղող մթերում են 130 դրամով:
Ավշարի գինու գործարանից փոխանցեցին, որ գինը դեռ հստակ չեն որոշել, բայց տատանվում է 110-150 դրամի սահմաններում:
Ոսկեվազի գինու գործարանից էլ հայտնեցին, որ խաղող չեն մթերում: «Գոլդն Գրեյպ Արմաս»-ը նույնպես չի մթերում․ մեզ հետ զրույցում նրանք տեղեկացրեցին, որ ունեն սեփական այգիները:
