«Պետք է բացահայտենք, թե ինչ հանգամանքներում և ում հրամանով տեղի ունեցավ ՀՀ ինքնիշխան տարածքի հանձնումն Ադրբեջանին». Արթուր Ղազինյան

Այսօր ԱԺ Պաշտպանության և անվտանգության հարցերի մշտական հանձնաժողովում իշխող խմբակցության պատգամավորները երրորդ անգամ դեմ քվեարկեցին «Հայաստան» խմբակցության պատգամավոր Արթուր Ղազինյանի թեկնածությանը՝  հանձնաժողովի փոխնախագահի պաշտոնում:

Լրագրողների հետ ճեպազրույցում Արթուր Ղազինյանն անդրադառնալով իրեն չընտրելու հարցին՝ ասաց, որ հանձնաժողովի նախագահի տեղակալը պաշտոն չի համարում, սակայն փոխնախագահը փաստացի դառնում  է ընդդիմության առաջին ներկայացուցիչը տվյալ հանձնաժողովում:

«Սա կապված է իմ անձի հետ, իմ քաղաքական նկրտումների և քաղաքական համարձակ գործունեության հետ: Օրենքը մեկ անձի առաջադրվելու համար սահմանափակումներ չի դնում, հնարավոր է 12, 25 անգամ առաջադրվել: Սա ինձ համար արդեն դարձել է հաճելի գործ, և յուրաքանչյուր հաջորդ նիստը առաջացնում է շատ ավելի մեծ հետաքրքրություն հանրության շրջանում: Յոթերորդ գումարման ԱԺ Պաշտպանության հանձնաժողովի փոխնախագահի անունը ոչ մեկը չի հիշում, բայց ես վստահեցնում եմ, որ ութերորդ գումարման ԱԺ այդ հանձնաժողովի տեղակալի թեման դեռ շատ երկար կհիշեք»,- նշեց Արթուր Ղազինյանը:

Ըստ նրա, այս ամենը որևէ կերպ չի խոչընդոտում հանձնաժողովի աշխատանքներին, որ, օրինակ, իշխանությունը  նիստի օրակարգում ներառեր նաև Որոտանում տեղի ունեցող դավաճանական գործընթացները:

«Պետք է բացահայտենք, թե ինչ հանգամանքներում և ում հրամանով տեղի ունեցավ ՀՀ ինքնիշխան տարածքի հանձնումը Ադրբեջանին, սա հանձնում էր և պետական դավաճանություն»,- շեշտեց «Հայաստան» խմբակցության անդամ Արթուր Ղազինյանը:

Մանրամասները՝ 168.am-ի տեսանյութում