Սեփական մեքենա չունեմ, օգտվում եմ կնոջս եղբորը պատկանող մեքենայից. Սասուն Խաչատրյան
Հակակոռուպցիոն կոմիտեի նախագահների թեկնածուների հարցազրույցի ժամանակ, կոմիտեի նախագահի թեկնածու, Հատուկ քննչական ծառայության պետ Սասուն Խաչատրյանն ասաց, որ իր բնակարանը ձեռք է բերել հիպոթեքային վարկով, բանկից ստացել է վարկ, որը երևում է իր հայտարարագրում։
«Բնակարանը ձեռք եմ բերել պետական ծրագրի շրջանակներում՝ ԵՊՀ շրջանավարտներ հ/կ-ից, իրականում տարբերությունը շատ մեծ չէ շուկայական արժեքի հետ։ Որքանով ինձ հայտնի է՝ այդ բնակարանների շուկայական արժեքի 1 քմ-ն մոտավորապես 800 դոլար է, մենք ձեռք ենք բերել մոտավորապես 600 դոլարով, սա էլ այդ պետական ծրագրի առավելությունն էր։ Ընդ որում, դա կատարվել է վարկային միջոցներով»,- նշեց Սասուն Խաչատրյանը։
Նա նաև տեղեկացրեց, որ սեփական մեքենա չունի, վերջին տարիներին օգտվել է կնոջ եղբորը պատկանող ավտոմեքենայից, նա մի քանի մեքենա ունի և բավականին ապահովված տղա է։
«Ես շատ քիչ եմ մեքենա վարում, քանի որ ունեմ ծառայողական ավտոմեքենա, առավոտից մինչև ուշ գիշեր հիմնականում աշխատավայրում եմ, եթե ավտոմեքենա վարելու անհրաժեշտություն է լինում, խնդրում եմ, տրամադրում է, և ես վարում եմ և փորձում եմ չխախտել կանոնները։ Եթե չեմ սխալվում, 2011-2012 թվականների մեքենա է, այն շահագործում եմ 2019 թվականից, ավտոմեքենայի շուկայական արժեքը, եթե չեմ սխալվում, մոտավորապես 10 մլն դրամ է։ Մեքենան մշտապես իմ տրամադրության տակ չի լինում, բայց հաճախ, երբ ես արձակուրդում եմ, կամ տեղ պետք է գնամ, այն լինում է իմ տրամադրության տակ, որովհետև ինչպես նշեցի՝ աներորդիս ունի մի քանի ավտոմեքենա և խնդիր չունի»,- հավելեց ՀՔԾ գործող պետը։
Նա նշեց, որ կարող է իրեն թույլ տալ նման մեքենա ձեռք բերել, պարզապես դրա անհրաժեշտությունը չկա։
