«Այս պահին Ստեփանակերտում ջրամատակարարման խնդիրը կարգավորված է». Արցախի «Ջրմուղ կոյուղի» ՓԲԸ տնօրեն
Արցախի Հանրապետության մայրաքաղաք Ստեփանակերտում վերականգնվել է ջրամատակարարումը։ Այս մասին 168.am-ի հետ զրույցում ասաց Արցախի «Ջրմուղ կոյուղի» ՓԲԸ տնօրեն Գագիկ Պողոսյանը։
«Այս պահին Ստեփանակերտում ջրամատակարարման խնդիրը կարգավորված է։ Սա կապված է նաև եղանակների հետ, վերջին 3-4 օրերի ընթացքում օդի ջերմաստիճանը կտրուկ իջել է, բացի դրանից՝ երկու օր անձրևներ են եկել, սա էլ է նպաստել ջրամատակարարման կարգավորմանը։ Կարող ենք ասել, որ ջրի խնդիր չի լինի»,- նշեց Գագիկ Պողոսյանը։
Հիշեցնենք՝ Ստեփանակերտում ջրանջատումները սկսվել էին օգոստոսի 6–ի երեկոյան ժամերից։ Ստեփանակերտի քաղաքապետի որոշմամբ, օգոստոսի 10-ից մայրաքաղաքում գործող բոլոր ավտոլվացման կետերի և հանգստի գոտիների ջրօգտագործումը դադարեցվել է մինչև քաղաքը սնուցող զտիչ կայաններում ջրի պաշարների վերականգնումը: Դրանից զատ, ռուս խաղաղապահները մեքենաներով ջուր էին տանում Ստեփանակերտ և բաժանում այն թաղամասերի բնակիչներին, որոնք զրկված էին ջրից։
