Մենք պետք է խթանենք կանանց բիզնես կարողությունները․ Արման Թաթոյանը Սյունիքում այցելել է արտադրամասեր
Մարդու իրավունքների պաշտպան Արման Թաթոյանը Սյունիքի մարզ կատարած վերջին այցի ընթացքում այցելել է կանանց համար զբաղվածություն ապահովող արտադրամասեր։
«Մենք պետք է ամեն կերպ աջակցենք կանանց բիզնես կարողությունների զարգացմանը, քանի որ ֆինանսապես կայուն եկամուտներ ունեցող կանայք կարող են հնարավորինս զերծ մնալ բռնությունից ու խտրականության այլ դրսևորումներից։ Կանանց ակտիվ ներգրավվածությունը երկրի սոցիալ-տնտեսական կյանքին ու որոշումների կայացման գործընթացներին բխում է հենց հասարակության շահերից»,- հանդիպումների ժամանակ նշել է Արման Թաթոյանը։
Մասնավորապես, ՄԱԿ-ի բնակչության հիմնադրամի ղեկավար Ծովինար Հարությունյանի հետ այցելել են Տեղ համայնքի Տեղ գյուղում գտնվող կարի արտադրամաս։ «Անգել» բարեգործական հասարակական կազմակերպության նախագահ Ժաննա Պրոկոպենկոն նշել է, որ իր նպատակը հնարավորինս շատ աշխատատեղեր ապահովելն է գյուղում բնակվող կանանց համար՝ ներդնելով այդ ոլորտում իր գիտելիքները։
Նորագույն տեխնոլոգիաներով հագեցած փոքրիկ արտադրամասում կարում են սրբիչներ, սպիտակեղեն, հագուստ, պայուսակներ և այլն։
Երկրորդ կանգառը եղել է Վերիշեն բնակավայրում գտնվող Կանանց զարգացման «Ռեսուրս կենտրոն» հիմնադրամի սոցիալական ձեռնարկությունում, որն ուսումնական կենտրոն է կյանքի դժվարին իրավիճակում հայտնված կանանց համար։
Կենտրոնի տնօրեն Ռուզաննա Տոռոզյանը Պաշտպանին ներկայացրել է Goris Handmade ապրանքանիշի 100% բնական բրդի տեսականին․ գորգեր, բարձեր, ծածկոցներ և ավելի քան 50 տարբեր խաղալիք կենդանիներ:
Ռուզաննա Տոռոզյանը նշել է, որ հիմնադրամի շահառուների թվում են ինչպես հաշմանդամություն ունեցող, այնպես էլ Արցախից տեղահանված ավելի քան 40 ընտանիքների կանայք, որոնք անցնում են ուսումնառություն և ստանում նոր մասնագիտություն՝ աշխատաշուկայում մրցունակ դառնալու համար (ձեռարվեստ, խոհարարություն, համակարգչային գիտելիքներ, հաշվապահություն, վարսահարդարում և այլն)։
Երրորդ արտադրամասը, որտեղ այցելել է Մարդու իրավունքների պաշտպանը «Կապանի կանանց ռեսուրս կենտրոնն» է եղել։ Կենտրոնի ղեկավար Քրիստինա Սաղաթելյանի ուղեկցությամբ Արման Թաթոյանը շրջել է կարի արտադրամասի տարածքում, որի արտադրանքը ներկայացված է Սյունիքի մարզի հագուստի սրահներում։
Մարդու իրավունքների պաշտպանը պատրաստակամություն է հայտնել իր իրավասության շրջանակում նպաստել կանանց ձեռք բերած կարողությունների զարգացմանը, այդ թվում՝ համատեղ միջոցառումներ իրականացնելով։
