ՈՒԵՖԱ-ն խոսել է Ռոնալդուի գոլի և մրցավարի սխալի մասին
ՈւԵՖԱ-ն բացատրել է, թե ինչու չի օգտագործվում VAR տեսանյութերի կրկնության համակարգն ԱԱ-2022 ընտրական խաղերում:
Պորտուգալիայի և Սերբիայի հավաքականների խաղում (2:2) «Յուվենթուսի» հարձակվող Կրիշտիանու Ռոնալդուն երկրորդ խաղակեսի լրացուցիչ ժամանակում գոլ խփեց, բայց մրցավարները չհաշվեցին գնդակը՝ որոշելով, որ գնդակը չի հատել դարպասի գիծը:
Հանդիպումը սպասարկում էր Նիդեռլանդների մրցավարների թիմը՝ Դենի Մաքքելիի գլխավորությամբ: Խաղում չկար VAR կամ գոլային համակարգ:
«2019 թվականին ՈւԵՖԱ-ն հրավիրեց ՖԻՖԱ-ին VAR-ն իրականացնելու այս ընտրական մրցաշարում:
Համաճարակի ազդեցությունը գործառնական և նյութատեխնիկական հնարավորությունների վրա ստիպել է ՈւԵՖԱ-ին հետաձգել Եվրոպական լիգայի խմբային փուլում կրկնապատկերների համակարգի իրականացումը մինչև 2021/22 մրցաշրջանը` 2020/21 մրցաշրջանից սկսելու փոխարեն, ինչպես նաև հետ կանչել իրագործելու առաջարկը Եվրոպայում 2022 թվականի Աշխարհի գավաթի ընտրական փուլում:
2020 թվականի աշնանը համակարգը չօգտագործվեց Ազգերի լիգայի խմբային փուլում, և, հետևաբար, մինչ այժմ համակարգը երբեք չի օգտագործվել ընտրական փուլում ազգային հավաքականների խմբային փուլի խաղերում»,- ասված է հայտարարության մեջ:
Սիրարփի Աղաբաբյան
