Արցախից նոր մանրամասներ են հայտնել ադրբեջանցի զինծառայողների կողմից հայկական ավտոմեքենաները քարկոծելու միջադեպից
Ասկերանի շրջանի Սարուշեն-Կարմիր գյուղերի ճանապարհահատվածին ադրբեջանցի զինծառայողների կողմից հայկական պետհամարանիշերով ավտոմեքենայի քարկոծման մեջադեպից հետո վնասված ավտոմեքենայի սեփականատեր Լենդրուշ Բաբայանը նույն ճանապարհով ընթացող մեկ այլ վարորդի հետ կանգնեցրել է ադրբեջանական ավտոշարասյունը և բացատրություն պահանջել ադրբեջանցի պատասխանատու սպայից:
Այս մասին «Արմենպրես»-ի հետ զրույցում ասաց Արցախի ներքին գործերի նախարարության արտակարգ իրավիճակների պետական ծառայության տեղեկատվության և հասարակայնության հետ կապերի բաժնի պետ Հունան Թադևոսյանը:
«Մարտի 25-ին ժամը 13:30-ի սահմաններում միջադեպ է տեղի ունեցել հայերի և ադրբեջանցիների միջև: Ռուսական խաղաղապահ ուժերի ուղեկցությամբ ընթացող ադրբեջանական ավտոշարասյան թափքից, ադրբեջանցի զինծառայողները քարերով հարվածներ են հասցրել նույն ճանապարհով ընթացող հայկական մեքենաների վրա, ինչի հետևանքով վնասվել է Լենդրուշ Բաբայանի վարած ՎԱԶ 21-07 մակնիշի ավտոմեքենայի դիմապակին:
Միջադեպից հետո Լ.Բաբայանը և նույն ճանապարհով ընթացող մեկ այլ վարորդ փակել են միջշրջանային ճանապարհը, կանգնեցրել շարասյունը և բացատրություն պահանջել ռուս խաղաղապահներից, ինչպես նաև ադրբեջանցի պատասխանատու սպայից:
Ըստ Լ.Բաբայանի, ադրբեջանցի սպան, որը ռուսաց լեզվով պատշաճ չէր հաղորդակցվում, լուսանկարել է մեքենան, խոստացել, որ անպայման կզեկուցի իրենց վերադասին, իսկ ռուս ուղեկցողները միջադեպի համար ներողություն են խնդրել, նշել, որ վնասը կփոխհատուցվի:
Դեպքի բոլոր մանրամասները պարզելու համար, տուժողը հարցաքննվել է Ոստիկանության Ասկերանի շրջանային բաժնում: Մեքենայի լուսանկարները, ինչպես նաև ռուսերեն թարգմանությամբ բացատրությունը ներքին գործերի նախարար Կարեն Սարգսյանն արդեն փոխանցել է գեներալ Մուրադովին:
Խաղաղապահ զորակազմն այս հարցով արդեն զբաղվում է: Ըստ ռուսական կողմի, խնդիրը ոչ միայն վնասի փոխհատուցումն է, այլ, այսուհետ նմանօրինակ դեպքերի բացառումը»,-մանրամասնեց Թադևոսյանը:
