Ինչո՞ւ է ՊՎԾ-ն հանկարծ հիշել Սյունիքի համայնքապետերին
168.am–ի տեղեկություններով՝ այսօր Պետական վերահսկողական ծառայությունը ստուգումների հանձնարարականով շտապել է այցելել Սյունիքի այն համայնքապետերին, որոնք խիստ զուգադիպությամբ ընդամենն օրեր առաջ հայտնել էին նոր՝ «Վերածնվող Հայաստան» կուսակցության ստեղծման մասին:
Նկատենք՝ նրանք այն համայնքապետերն են, որոնք ամիսներ շարունակ բարձրաձայնում են պատերազմից հետո Սյունիքում առկա անվտանգային խնդիրների և կառավարության անգործության մասին:
Թե ինչո՞ւ է ՊՎԾ-ն հանկարծ հիշել Գորիսի, Սիսիանի, Մեղրու, Քաջարանի համայնքապետերին՝ փորձեցինք ճշտել հենց նրանցից:
Մեզ հաջողվեց կապ հաստատել Սիսիանի համայնքապետ Արթուր Սարգսյանի և Մեղրու համայնքապետ Մխիթար Զաքարյանի հետ. նրանք հաստատեցին ՊՎԾ ստուգումների մասին տեղեկությունները:
«Այսօր եկել են հանձնարարականով ստուգումները սկսելու»,- ասաց Սիսիան համայնքի ղեկավարը՝ նկատելով, որ չի ցանկանում քաղաքականացնել:
Թե ինչ առիթով են եկել ստուգումների՝ մեր հարցին ի պատասխան՝ Արթուր Սարգսյանն ասաց. «Ասում են, որ հանձնարարագիր կա, հանձնարարագրով եկել են ստուգումների՝ 2016 թվականից՝ իմ պաշտոնավարումից, մինչև այսօր»:
Նա նաև տեղեկացրեց, որ ստուգումները տևելու են մարտի 24-ից մինչև ապրիլի 30-ը:
Մեղրու համայնքապետն էլ նշեց, որ դեռ չի հանդիպել ՊՎԾ աշխատակիցների հետ, քանի որ գործով Կապանում է եղել, սակայն տեղյակ է, որ համայնքապետարանում են, և պատրաստվում է հանդիպել:
Մխիթար Զաքարյանի խոսքով, ՊՎԾ-ն առաջին անգամ է ստուգումներ անցկացնում իրենց համայնքում. «Նորմալ ստուգումը մենք ընկալում ենք՝ որպես հնարավորություն ավելի բարելավելու աշխատանքը: Եթե օբյեկտիվ ստուգում լինի, մենք դա ընկալում ենք հնարավորություն՝ սխալներն ուղղելու, բայց տեսնենք, էլի»:
Արդյոք քաղաքական դրդապատճառներ տեսնո՞ւմ է՝ մեր հարցին համայնքի ղեկավարը պատասխանեց. «Այս պահին, գիտեք, անմեղության կանխավարկածը խախտած կլինեմ: Իհարկե, շատ բան եմ մտածում, բայց մինչև հիմք չունենամ, ճիշտ չի լինի արտահայտվել:
Խնդիր չեմ տեսնում առայժմ. ստուգման ընթացքից մնացածը կերևա»:
Ըստ նրա տեղեկությունների՝ ստուգումները տևելու են մեկ ամիս:
Հիշեցնենք՝ հենց հունվար ամսին վարչապետի որոշմամբ Պետական վերահսկողական ծառայության ղեկավար էր նշանակվել «Իմ քայլը» խմբակցության նախկին պատգամավոր, «Քաղաքացիական պայմանագիր» կուսակցության հիմնադիր անդամ Տիգրան Ուլիխանյանը:
