Հարավային Կորեան հավաստել է, որ ԿԺԴՀ-ն երկու հրթիռ է արձակել մարտի 21-ին
Կորեայի Հանրապետության Շտաբների պետերի կոմիտեն մարտի 24-ին հավաստել է, որ ԿԺԴՀ-ն անցյալ կիրակի օրը կատարել է երկու թեւավոր հրթիռների թեստային արձակում: Այդ մասին հայտնել է Yonhap գործակալությունը:
Reuters գործակալության տվյալներով՝ Շտաբների պետերի կոմիտեում հայտարարել են, որ արձակմանը հետեւել են իրական ժամանակի ռեժիմով:
Ինչպես նշել է փորձարկումների մասին մարտի 23-ին տեղեկացրած The Washington Post թերթը, «ԿԺԴՀ-ն կիրակի օրը չի մեկնաբանել իր հրթիռային արձակումները, ինչն առաջացրել է ԱՄՆ-ի եւ Հարավային Կորեայի պաշտոնատար անձանց շփոթմունքը», քանի որ սովորաբար Փհենյանն ուշադրություն է հրավիրում նման իրադարձություններին: Փորձարկումների մասին, հրատարակության տվյալներով՝ իմացել են ամերիկյան հետախուզական ծառայությունները, հաղորդել է ՏԱՍՍ-ը:
