«Համաշխարհային ֆուտբոլի օրացույցը պետք է ամբողջովին վերակառուցվի»․ Վենգեր
«Արսենալի» նախկին գլխավոր մարզիչ Արսեն Վենգերը, ով այժմ աշխատում է ՖԻՖԱ-ում, խոսել է թիմերի խաղացանկի մասին:
«Ես երազանք ունեմ և այն ամրապնդում եմ՝ աշխատելով Ճապոնիայում: Մենք խաղում էինք մարտից նոյեմբեր, և դա կատարյալ գրաֆիկ էր: Այս դեպքում այլևս չի լինի «նա դարձավ 2018/19 մրցաշրջանի չեմպիոն» արտահայտությունը: Ոչ, այս դեպքում կասենք՝ նա չեմպիոն դարձավ 2018-ին կամ 2019-ին:
Կարծում եմ, որ օրացույցը պետք է ամբողջովին վերակառուցվի: Ինֆանտինոյի հետ միասին մենք փորձում ենք հանդիպում կազմակերպել ֆուտբոլային աշխարհի գլխավոր դեմքերի հետ և քննարկել ամբողջական վերակազմակերպումը: Մենք պետք է այնպես ծրագրենք ապագան, որ ստիպված լինենք ավելի քիչ ճանապարհորդել:
2022 թվականի Աշխարհի առաջնության դեպքում, նոյեմբերից սկսած, մենք լավ հնարավորություն ունեցանք փոխել մրցաշրջանի կառուցվածքը, բայց դա տեղի չի ունենա:
Լայն քննարկումները կսկսվեն մարտին: Համոզված եմ, որ համաշխարհային ֆուտբոլի հավասարակշռված լինելու համար պետք է տեղի տան կամ եվրոպացիները, կամ մնացած աշխարհը: Չմոռանանք, որ ամառային արձակուրդը սկսվեց այն ժամանակ, երբ ֆուտբոլը պրոֆեսիոնալ չէր՝ ավելի քան հարյուր տարի առաջ: Այսօր ֆուտբոլիստները չեն հանգստանում ամբողջ ամառ:
Համաշխարհային ֆուտբոլի երկրորդ խնդիրը Եվրոպայի և մնացած երկրների միջև եղած անջրպետն է: Եթե աշխարհի առաջնություններին ավելի շատ հավաքականներ մասնակցեին, դա կնպաստի փոքր երկրներում սպորտի զարգացմանը: Նրանք ավելի շատ հնարավորություններ կունենային խաղալու գլոբալ մակարդակում:
Միգուցե ակումբների շրջանում Աշխարհի գավաթը կօգնի ավելի շատ գումար հավաքել մրցաշարերի համար, բայց այդ դեպքում պետք է համոզվեք, որ բոլոր միջոցները չեն գնա խոշոր թիմերի, որ մի մասը կուղղվի փոքր երկրներում խաղի զարգացմանը:
Աշխարհի առաջնությունում թիմերի միջին տարիքը 27-28 տարեկանն է: Երբ ֆուտբոլիստները կարողանան կրկին խաղալ այս մրցաշարում, նրանք կդառնան 31-32 տարեկան, այնպես որ, հաղթելու հավանականությունը շատ քիչ է: Ահա թե ինչու, թերևս, Աշխարհի գավաթը պետք է անցկացվի երկու տարին մեկ, ինչպես Եվրոն և այլ մրցաշարեր:
Անհրաժեշտ է անցկացնել միայն կարևոր մրցումներ և հեռացնել զուգահեռ բոլոր մրցաշարերը: Մարդիկ պետք է հասկանան, թե ինչն է վտանգված, և միայն տեսնեն հանդիպումներ, որոնցում ինչ-որ բան որոշվում է»,- ասել է Վենգերը:
Սիրարփի Աղաբաբյան
