Հայաստանում կներդրվի օրինապահ հարկ վճարողների խրախուսման համակարգ, իսկ ապրիլի 19-ը կնշվի՝ որպես «Հարկ վճարողի» օր
ԱԺ Տնտեսական հարցերի մշտական հանձնաժողովի այսօրվա նիստում քննարկվեց կառավարության հեղինակած Հարկային օրենսգրքում լրացումներ կատարելու և «Տոների և հիշատակի օրերի մասին» օրենքներում լրացում կատարելու վերաբերյալ նախագծերը։
Ներկայացնելով Հարկային օրենսգրքում փոփոխություններ կատարելու վերաբերյալ նախագիծը, Պետական եկամուտների կոմիտեի նախագահ Էդուարդ Հովհաննիսյանն ասաց, որ նախագծի ընդունումը պայմանավորված է Կառավարության որդեգրած՝ հարկային կամավոր կարգապահության խրախուսման, օրինապահ հարկ վճարողների համար գործունեության բարենպաստ պայմաններ ստեղծելու քաղաքականությամբ, ինչպես նաև հարկային մարմին-հարկ վճարող գործընկերային հարաբերություններն ամրապնդելու համար անհրաժեշտ նորմատիվ հիմքեր ապահովելու առումով:
«Հաշվի առնելով այն հանգամանքը, որ պետության և հարկ վճարողների հարաբերությունները չեն սահմանափակվում միայն վերջիններիս կողմից սահմանված պարտավորությունների կատարմամբ, այլ ընդգրկում են ավելի լայն շրջանակ՝ պետականաշինության գործում հարկ վճարողների դերն ըստ արժանվույն գնահատելու և պետության ու հարկ վճարողների միջև գործընկերային հարաբերությունների զարգացման նպատակով՝ անհրաժեշտություն է առաջացել ընդունել սույն օրենքների նախագծերի փաթեթը։ Օրենքով նախատեսվում է Հայաստանում ներդնել օրինապահ հարկ վճարողների խրախուսման համակարգ»,- ասաց ՊԵԿ նախագահը:
Ըստ նրա, հավաստագիր ունեցող հարկ վճարողների ցանկը տրամադրվում է Կենտրոնական բանկին, որն էլ առաջին հերթին՝ դրա մասին տեղեկացնում է առևտրային բանկերին՝ հավաստագրի գործողության ընթացքում վարկ ստանալու համար՝ օրինապահ հարկ վճարողների դեպքում ռիսկերը գնահատելու նպատակով։
Անդրադառնալով «Տոների և հիշատակի օրերի մասին» օրենքներում լրացում կատարելու մասին նախագծին, ՊԵԿ նախագահը նշեց, որ նախագծով առաջարկվում է սահմանել «Հարկ վճարողի» օր։
«Հաշվի առնելով ՀՀ պետական բյուջեի եկամուտների վրա ծավալուն հարկերի գերակշիռ ազդեցությունը, առաջարկում ենք ապրիլի 19-ը՝ որպես ՀՀ-ում առաջին հարկային օրենքի ընդունման օր, քանի որ այդ օրենքով են ի սկզբանե կարգավորվել հարկային իրավահարաբերությունները, և այդ օրը սահմանել Հարկ վճարողի օր»,- ասաց Էդվարդ Հովհաննիսյանը։
Նա ընդգծեց, որ նշված օրն իր ազդեցությունը կունենա հարկային մարմին-հարկ վճարող հարաբերությունների վրա, այդ օրը տեղի կունենա որոշակի միջոցառում՝ հարկ վճարողների մերձեցման կամ այլ որոշակի ծառայությունների մատուցման կոնտեքստում։
Հանձնաժողովը դրական եզրակացություն տվեց օրենքների նախագծերին։
