Մարկ Ցուկերբերգը կանխատեսում է տելեպորտացիա  մինչ 2030 թվականը

Facebook-ի ղեկավարը կանխատեսել է հեղափոխական փոփոխություններ՝ օգտագործելով վիրտուալ և լրացված իրականության տեխնոլոգիաներ:

Facebook-ի համահիմնադիր և ղեկավար Մարկ Ցուկերբերգն ասում է, որ ինքը ահռելի ներուժ է տեսնում վիրտուալ (VR) և լրացված իրականության (AR) տեխնոլոգիաների զարգացման մեջ: Նա կարծում է, որ մինչև 2030 թվականը մարդիկ կկարողանան տելեպորտացվել  այլ վայրեր՝ օգտագործելով VR աջակցությամբ խելացի ակնոցներ, և հեռավորության վրա հանդիպել միմյանց ներկայության առավել իրատեսական ազդեցությամբ:

Մարկ Ցուկերբերգը թվային տեխնոլոգիաների մոտ ապագայում զարգացման իր տեսլականի մասին խոսել է The Information-ի պոդքաստում։

«Նախ, մենք սոցիալական ընկերություն ենք: Մենք ձգտում ենք անել այնպիսի բաներ, որոնք մարդկանց օգնում են շփվել տարբեր ձևերով՝ անձնական տեքստային հաղորդագրություններից՝ մինչև տեսանյութեր և լուսանկարներ, որոնք կարող եք տեղադրել: Սոցիալական հաղորդակցության «սուրբ գրաալը» զգալու կարողությունն է, կարծես դու անձամբ շփվում ես մեկ այլ անձի հետ: Այսօր առկա տեխնոլոգիաներից ոչ մեկը մեզ չի մոտեցնում դրան՝ լինեն դա հեռախոսներ, համակարգիչներ, հեռուստատեսություն կամ նույնիսկ վիդեո զրույցներ: Այժմ մենք ունենք տեխնոլոգիաներ, որոնք մեզ թույլ են տալիս շփվել, և որոնք, տարբեր աստիճանի ճշգրտությամբ, օգնում են մեզ տեսնել, թե ինչ է անում դիմացինը: Բայց կա մեկ այլ բան՝ ամբողջովին կախարդական, որը տալիս է անձնական ներկայության զգացողություն, այն զգացողությունը, որ դուք ուղղակիորեն գտնվում եք մեկ այլ մարդու հետ․ այս ամենն արդեն տեղափոխվում է հոգեբանական մակարդակ»:

Մարկ Ցուկերբերգը VR-ն և AR-ն համարում է նման տեխնոլոգիաներ` ենթադրելով, որ մոտ ապագայում դրանք կօգնեն հեղափոխել սոցիալական հաղորդակցությունը: Նա կարծում է, որ մինչև 2030 թվականը մարդիկ կկարողանան օգտագործել VR և AR տեխնոլոգիաներով խելացի ակնոցներ՝ տելեպորտացվելով այլ վայրեր, օրինակ՝ ընկերների և ծանոթների տներ կամ հասարակական շենքեր, օգտագործողի վիրտուալ ներկայություն: Նման ակնոցները շատ իրատեսական կլինեն:

Ցուկերբերգը կարծում է, որ վիրտուալ իրականությունը հնարավորություն կտա մարդուն, ըստ էության, զգալ իր ֆիզիկական ներկայությունը մեկ այլ վայրում՝  հեռվում միմյանց հետ առերես հանդիպումներ անցկացնելով, ինչն այժմ չեն կարող ապահովել VR սաղավարտի նման սարքերը: Նման տեխնոլոգիաները կարող են հանգեցնել այն փաստին, որ մարդիկ սկսեն ավելի քիչ տեղաշարժվել, օրինակ՝ գործուղումների ժամանակ: Եվ նման ճանապարհորդության կրճատումը, ըստ Ցուկերբերգի, կարող է օգնել պահպանել կլիման:

«Իհարկե, մարդիկ կշարունակեն օգտագործել մեքենաներ, ինքնաթիռներ և այդ ամենը: Բայց որքան շատ մենք կարողանանք զարգացնել այս տեսակի տելեպորտացիան (VR-ի և AR-ի օգնությամբ), այնքան լավ կլինի ոչ միայն՝ հասարակության, այլև՝ ամբողջ մոլորակի համար»,- կարծում է Facebook-ի ղեկավարը:

«Այս ամենը կհանգեցնի միանգամայն զարմանալի բաների, շատ ավելի տպավորիչ, քան պարզապես ինչ-որ մեկին զանգահարելը կամ վիդեո զրուցելը: Դուք կարող եք պարզապես մի քանի գործողություն անել, տելեպորտացվել, և այժմ դուք արդեն նստած եք մեկ այլ վայրում, և բոլորին թվում է, որ դուք իսկապես մոտ եք միմյանց»։

Նման տելեպորտացիայի մեկ այլ առավելությունը Մարկ Ցուկերբերգն անվանում է ընկերության աշխատակիցների համար հեռավոր աշխատանքի ռեժիմն ընդլայնելու հնարավորություն, ինչն էապես կնվազեցնի աշխատանքի վայր տեղափոխվելու ժամանակն ու ծախսերը, քանի որ հնարավոր կլինի պարզապես հեռավար աշխատել։ «Մենք բավականին քիչ խոսեցինք կլիմայի փոփոխության մասին, նախքան դրանք իրոք շատ կարևոր կդառնային: Ապագայում մարդիկ կարող են ցանկանալ ավելի քիչ տեղաշարժվել տարածության մեջ կամ դա անել ավելի արդյունավետ՝ առանց ճանապարհորդության հասարակական տրանսպորտում»,- առաջարկել է Մարկ Ցուկերբերգը:

Հաղորդակցման համար VR-ի զարգացման մեկ այլ կարևոր մասը, ըստ Ցուկերբերգի, այսպես կոչված, վիրտուալ մարդկային ավատարների՝ անձի թվային 3D պատկերի ստեղծումն է:

«Վիրտուալ տեխնոլոգիաների և հարակից սարքավորումների զարգացման շնորհիվ վիրտուալ ավատարները կարող են իսկական առաջընթաց ապահովել մարդկային հաղորդակցության մեջ: Ինձ շատ ոգեշնչող բաներից մեկը տեխնոլոգիան է, որը թույլ է տալիս ֆիքսել և հետևել ոչ միայն դեմքի արտահայտություններին, այլև աչքերի շարժումներին: Ընդլայնված սենսորները կարող են ծայրաստիճան իրատեսական ավատարներ ապահովել, որոնց միջոցով կարող եք միմյանց հետ շփվել»,- ասել է Facebook-ի ղեկավարը, որը 2014 թվականին վիրտուալ իրականության սաղավարտ արտադրող Oculus-ը գնել է 2.3 միլիարդ դոլարով: «Ավելի շատ սենսորներ VR սարքերում, որպեսզի մարդը ստանա որքան հնարավոր է շատ հնարավորություններ` անմիջական հաղորդակցության փորձը զգալու համար»:

Սիրարփի Աղաբաբյան