Սոցապ նախարարության մամուլի խոսնակը՝ Նորքի տուն-ինտերնատը փակելու լուրերի մասին
«Հրապարակ» թերթը գրել էր, որ Աշխատանքի և սոցիալական հարցերի նախարար Մեսրոպ Առաքելյանը մտադիր է փակել Նորքի տուն-ինտերնատը՝ այն միացնելով թիվ 1 տուն-ինտերնատին։
Տեղեկություններ են շրջանառվում նաև, որ վերջնարդյունքում կվաճառեն Նորքի տուն-ինտերնատի շենքը:
Թեմայի առնչությամբ թիվ 1 տուն-ինտերնատի տնօրեն Վահան Զուրաբյանն ասել է, որ նման բան ինքն էլ է լսել, սակայն նախարարությունից հանձնարարական չի ստացել։
Աշխատանքի և սոցիալական հարցերի նախարարի խոսնակ Զառա Մանուչարյանից 168.am-ը հետաքրքրվեց՝ կա՞ նման բան, թե՞ ոչ, վերջինս պատասխանեց.
«Ե՛վ Նորքի տուն ինտերնատի, և՛ թիվ 1 տուն-ինտերնատի տարեցները շարունակում են ապրել և խնամք ստանալ իրենց կառույցներում։ Շենքի վաճառքի վերաբերյալ տեղեկություններն իրականությանը չեն համապատասխանում, տարեցների տեղափոխում չի իրականացվում»։
