««Դըմփ-դըմփ-հու»-ի իմաստը միասնական, դժվարություններին միասին դիմակայելու կոչ էր՝ ի՞նչ տարօրինակ բան կա». Հովիկ Աղազարյան
ԱԺ «Իմ քայլը» խմբակցության պատգամավոր Հովիկ Աղազարյանի խոսքով՝ երեկ խորհրդարանում դիպուկահարների ու մեծաքանակ ոստիկանների առակայությունը պայմանավորված է եղել նրանով, որ ըստ էության իրավապահ մարմինները տեղեկություններ են ստացել, որ չեն բացառվում սադրիչ գործողությունները:
«Դրա համար կային բոլոր հիմքերը, հիմքերը տարբեր հայտարարություններ են քաղաքական ուժերի կողմից, մասնավորապես՝ Բաղրամյան պողոտայի հարթակում, հատկապես Վազգեն Մանուկյանի կողմից հնչեցրած հայտարարությունները: Օրինակ, որ ասում է, թե պատգամավորներին հատ-հատ կբերեն, ես մի քիչ չէի հավատում, որ ինքը նման միտք արտահայտած կլինի, որովհետև բոլոր դեպքերում ես իր մասին ուրիշ կարծիքի եմ, բայց երբ լսեցի՝ շատ զարմացա: Կամ որ ասում է, պետք է կայծակնային արագությամբ իշխանություն վերցնեն, գրավեն շենքեր, և այլն»,- խորհրդարանում լրագրողների հետ ճեպազրույցում ասաց Հովիկ Աղազարյանը:
Ըստ նրա, որևէ սարսափելի բան չի տեսնում, որ դիպուկահարներ են տեղակայված եղել ԱԺ շենքում, քանի որ այդ ամենը մեծ կանխարգելիչ նշանակություն կարող է ունենալ:
«Հիմա իմ վրա ճնշում չկա՞, կա, ընտրողների իրավունքն է՝ ճնշում գործադրել պատգամավորների վրա, դա նորմալ է; Դե, մենք վախկոտ ենք, դրա համար դիպուկահարներ ենք տեղակայում, իսկ ՀՀԿ-ն վախկոտ չէր»,- շեշտեց Հ. Աղազարյանը:
168.am–ի հարցին՝ նորմա՞լ էր, երբ իշխանությունը մարտի 1-ին զոհերի հիշատակին հարգանքի տուրք մատուցելու ժամանակ դըմփ-դըմփ-հու էր անում ու ծափահարում, Հովիկ Աղազարյանը պատասխանեց, որ դըմփ-դըմփ-հու-ն Մյասնիկյանի արձանի մոտ չեն արել, դա իրականացվել է քայլելու ժամանակ:
«Մենք պետք է հասկանանք, որ «դըմփ-դըմփ-հու»-ի իմաստը միասնական, դժվարություններին միասին դիմակայելու կոչ էր, հետևաբար՝ այստեղ ի՞նչ տարօրինակ բան կա»,- շեշտեց Հովիկ Աղազարյանը:
ԱԺ «Իմ քայլը» խմբակցության պատգամավոր Հովիկ Աղազարյանի խոսքով՝ երեկ խորհրդարանում դիպուկահարների ու մեծաքանակ ոստիկանների առակայությունը պայմանավորված է եղել նրանով, որ ըստ էության իրավապահ մարմինները տեղեկություններ են ստացել, որ չեն բացառվում սադրիչ գործողությունները:
