Ստամբուլի քաղաքապետին մինչև 2 տարվա ազատազրկում է սպառնում

Թուրքիայում կայացել են Ստամբուլի քաղաքապետ Էքրեմ Իմամօղլուի դեմ հարուցված դատական գործի լսումները։ Իմամօղլուն մեղադրվում Օրդու նահանգի նախկին նահանգապետ Սեդդար Յավուզին վիրավորելու մեջ։ Այս մասին գրում է ermenihaber.am-ը:

Ըստ մեղադրանքի՝ Իմամօղլուն հունիսի 5-ին՝ Օրդուից Ստամբուլ վերադառնալիս, օդանավակայանում տեղի ունեցած վեճի ժամանակ վիրավորել է Օրդուի նահանգապետին, ինչի առթիվ նահանգապետարանը հայց է ներկայացնել վերջինիս դեմ։

Պաշտպանության կողմը պնդում է, որ իրականում Իմամօղլուն վերադառնալիս է եղել հանրահավաքից, նրա ձայնը խզված է եղել, ինչի արդյունքում էլ խոսքերը սխալ են հասկացվել։

Մասնավորապես Իմամօղլուին վերագրվում է «նահանգապետը շանտղություն է արել» խոսքերը (թուրքերեն՝ vali itlik yapmıştır), մինչդեռ, ըստ պաշտպանական կողմի՝ Իմամօղլուն իրականում ասել է՝ «Նահանգապետը մանրացել է» (թուրք․՝ vali basitlik yapmış), բայց առաջին վանկը ձայնի խզվածության պատճառով չի լսվել։

Դատախազությունը Ստամբուլի քաղաքապետի համար 6 ամսից մինչև 2 տարի ազատազրկում է պահանջել։ Իմամօղլուի փաստաբանի պահանջով նիստը հետաձգվել է։