Տիգրան Ավինյանը չպատասխանեց լրագրողների որևէ հարցի
Արցախի 44-օրյա պատերազմից հետո կառավարության շատ ներկայացուցիչներ, խորհրդարանում կառավարության հետ հարցուպատասխանից առաջ, նիստերի դահլիճ են մտնում ԱԺ նախագահի համար նախատեսված մուտքից: Միայն 1-2 նախարարներ են, որ նիստերի դահլիճ են մտնում սովորական մուտքից:
Ի զարմանս լրագրողների, այսօր փոխվարչապետ Տիգրան Ավինյանը նիստերի դահլիճ մտավ սովորական մուտքից, սակայն լրագրողների որևէ հարցի չպատասխանեց:
168.am-ի հարցին՝ ինչպե՞ս են կառավարությունից արձագանքում Ադրբեջանի նախագահի այն հայտարարությանը, որ Ադրբեջանում այլևս հայ ռազմագերի չկա, ինչպե՞ս են պատրաստվում լուծել ռազմագերիների խնդիրը, Տիգրան Ավինյանը չպատասխանեց:
Լրագրողները նաև հետաքրքրվեցին, թե ինչպե՞ս է վերաբերվում ընդդիմության պահանջին՝ Նիկոլ Փաշինյանի հրաժարականի վերաբերյալ կամ ԳՇ պետի հետ կապված ի՞նչ զարգացումներ են սպասվում, և այլն, սակայն Տիգրան Ավինյանը որևէ հարցի չպատասխանեց, միայն հարցին, թե՝ ինչո՞ւ հայկական կողմը չի պատասխանում Ալիևի հոխորտանքներին, Տիգրան Ավինյանը հակիրճ պատասխան տվեց. «Մենք պատասխանել ենք»:
Տեսանյութը՝ 168.am-ի