Ընդդիմությունն սկսել է Վրաստանի խորհրդարանի պիկետումը. ձերբակալվել է ակցիայի մասնակիցներից մեկը
Վրաստանի խորհրդարանի մուտքի մոտ, որտեղ ընդդիմադիր կուսակցությունների առաջնորդները եւ նրանց կողմնակիցներն օրենսդիր մարմնի պիկետում են կազմակերպել լիագումար նիստի օրը, առավոտվանից մոբիլիզացված է ոստիկանությունը։
Պիկետումն սկսվել է 9:00-ից: Յուրաքանչյուր պատգամավորի հայտնվելը հարուցում է պիկետի մասնակիցների բուռն արձագանքը: Բողոքավորները խորհրդարանականներին դիմավորում են վիրավորական բացականչություններով, ինչն արդեն հանգեցրել է ոստիկանության հետ ընդհարման: Մեկ մարդ ձերբակալված է, դա «Միասնական ազգային շարժման» անդամ Բեսո Գազդելիանին է:
Ինչպես ավելի վաղ հայտարարել է ընդդիմությունը, դա բողոքի խաղաղ ակցիա է, որտեղ իրենք մեկ անգամ եւս կհնչեցնեն իրենց պահանջները. արտահերթ ընտրությունների անցկացում եւ այսպես կոչված «քաղբանտարկյալների» ազատ արձակում: Ընդդիմության պլաններում են նաեւ մարտի 5-ին կառավարական դիվանատան շենքի պիկետումը, մարտի 9-ին՝ բողոքի ակցիա Վրաստանի ներքգործնախարարության մոտ, մարտի 11-ին՝ ակցիա Թբիլիսիի քաղաքային դատարանի մոտ, մարտի 13-ին ընդդիմությունը կրկին հանրահավաքի կգնա խորհրդարանի մոտ Ռուսթավելիի պողոտայում, հաղորդել է Sputnik-ը:
