ԱՄՆ-ի և Մեքսիկայի ղեկավարները կզարգացնեն համագործակցությունը համավարակի դեմ պայքարի բնագավառում
ԱՄՆ-ի եւ Մեքսիկայի նախագահներ Ջո Բայդենը եւ Անդրես Մանուել Լոպես Օբրադորը մարտի 1-ին կայացած վիրտուալ ձեւաչափով բանակցություններում համաձայնության են եկել զարգացնելու համագործակցությունը համավարկի դեմ պայքարի բնագավառում: Դա հետեւում է երկու երկրների համատեղ հայտարարությունից, որը մարիտի 1-ին տարածել է Սպիտակ տունը։
«Նրանք համաձայնության եկան խորացնելու համագործակցությունը համավարակի հակազդման բնագավառում, այդ թվում հանրային առողջապահության հնարավորությունների ընդլայնման, տեղեկատվության փոխանակման եւ միգրացիոն քաղաքականության մշակման միջոցով: Գիտակցելով երկկողմ տնտեսական հարաբերությունների ռազմավարական կարեւորությունը՝ նրանք հավաստեցին իրենց կողմնակցությունը Կանադայի, Մեքսիկայի եւԱՄՆ-ի առեւտրական համաձայնագրին (…): Երկու ղեկավարները պայմանավորվեցին ամրապնդել մատակարարումների շղթաների կայունությունն ու անվտանգությունը, (…) (նրանք) նաեւ համաձայնվեցին վերականգնելու բարձր մակարդակի տնտեսական երկխոսությունն այդ նպատակներին հասնելու համար»,- ասված է փաստաթղթում: Բացի դրանից, երկու երկրների նախագահները նաեւ քննարկել են համագործակցությունն անվտանգության, կլիմայի փոփոխության դեմ պայքարի, կոռուպցիայի հակազդման ոլորտներում, ինչպես նաեւ միգրացիոն քաղաքականության հարցերում, հաղորդել է ՏԱՍՍ-ը:
