«Թուրքիան անհանգստանում է Նիկոլ Փաշինյանի իշխանության կորստով». Թուրքագետը՝ Չավուշօղլուի հայտարարության մասին

Թուրքիայի արտգործնախարար Մևլութ Չավուշօղլուն Բուդապեշտում, որտեղ գտնվում է աշխատանքային այցով, անդրադարձել է Հայաստանում տեղի ունեցող իրադարձություններին՝ նշելով, որ տեղի ունեցածը ռազմական հեղաշրջման փորձ է:

«Աշխարհի որ հատվածում էլ լինի հեղաշրջում, մենք դատապարտում ենք: Մենք վճռականորեն դատապարտում ենք այդ փորձը (Հայաստանում): Կարելի է քննադատել, պահանջել կառավարության հրաժարականը, դա նորմալ է: Ոչ միայն բանակի օգնությամբ կառավարության տապալումը, այլև նույնիսկ դրա կոչն անընդունելի է»,–ասել է Չավուշօղլուն:

168.am-ի հետ զրույցում ԵՊՀ արևելագիտության ֆակուլտետի դեկան, թուրքագետ Ռուբեն Մելքոնյանն անդրադառնալով Թուրքիայի արտգործնախարարի հայտարարությանը՝ նկատեց.

«Թուրքիայի հապճեպ ու անհանգիստ արձագանքը խոսում է այն մասին, որ Հայաստանում տեղի ունեցող գործընթացներն անհանգստացնում են Թուրքիայի ներկայիս իշխանություններին։ Իսկ այն, ինչն անհանգստացնում է Թուրքիային, տրամաբանորեն չի կարող լինել հայանպաստ, կարող է լինել միայն հակահայկական»։

Ըստ Ռուբեն Մելքոնյանի, Չավուշօղլուիի անհանգստությունը ցույց է տալիս այն անկումային գործընթացները, որոնք տեղի են ունենում Հայաստանում, լիովին համապատասխանում է  Թուրքիայի շահերին և այդ անկումային պրոցեսների ցանկացած կասեցում անհանգստացնում է Թուրքիային։

«Մենք տեսանք, որ ամենաառաջին ու անհանգիստ արձագանքը եկավ Թուրքիայից։ Մենք կարող ենք ասել, որ այո՛, Թուրքիան այն երկրներից է, որն անհանգստանում է Նիկոլ Փաշինյանի իշխանության կորստով։ Կարող ենք ասել, որ Նիկոլ Փաշինյանի իշխանության մեջ կան բազմաթիվ կերպարներ, որոնց գործունեությունն ընդգծված թուրքական է, նույնիսկ նրանց բառապաշարը համընկնում է Թուրքիայի բառապաշարին։ Այնպես որ, Չավուշօղլուի հայտարարությունը բացահայտում է կամ թույլ է տալիս, որ այն մարդիկ, որոնք մինչ օրս չէին նկատում հայկական իշխանության մեջ եղած թուրքական շահերի պաշտպաններին, այդ միջոցով գուցե նրանք կարողանան տեսնել, որ այն, ինչը ձեռնտու է Թուրքիային, չի կարող ձեռնտու լինել Հայաստանին»,- հավելեց թուրքագետը։

Միաժամանակ նա ընդգծեց, որ եթե Հայաստանում տեղի ունեցող իրադարձություններից Չավուշօղլուն անհանգստացած է, նշանակում է՝ ամեն ինչ ընթանում է  հայանպաստ ուղիով և թուրքական սցենարին չի համապատասխանում։

«Չավուշօղլուի  նման քաղաքական գործիչը կոմպլեքսավորված է հեղաշրջում երևույթից, բայց այն, ինչ արվել է հայկական բանակի կողմից, ամենևին այն չէ, ինչ Թուրքիայում տեղի է ունեցել 4 անգամ, այսինքն՝ հեղաշրջում։ Եվ զուգահեռներ տանել այդ հեղաշրջման փորձերի ու ՀՀ գլխավոր շտաբի հայտարարության միջև՝ անտեղին են»,- եզրափակեց Ռուբեն Մելքոնյանը։

Հիշեցնենք, որ 2018 թվականին Հայաստանում տեղի ունեցած իշխանափոխության ժամանակ Թուրքիայի կողմից որևէ արձագանք ու անհանգստություն չի արտահայտվել։