Գլխավոր շտաբի նախկին պետը գլուխը պատին է տալիս. Հրանտ Բագրատյան
Հայենիքի փրկության շարժման փետրվարի 20-ի հանրահավաքին ընդառաջ՝ այսօր շարժման վարչապետի թեկնածու Վազգեն Մանուկյանը ժողովրդին հրավիրել էր Ազատության հրապարակ՝ քննարկելու մի շարք հարցեր:
Ազատության հրապարակում էր նաև «Ազատություն» կուսակցության առաջնորդ, ՀՀ նախկին վարչապետ Հրանտ Բագրատյանը: Նա պատասխանեց լրագրողների մի շարք հարցերին:
«Երբ դեռ պատերազմը չէր սկսվել, հայտարարեցիք, որ՝ Ալիևի տեղը լինեմ, կհարձակվեմ Հայաստանի վրա»՝ հարցին ի պատասխան՝ Հրանտ Բագրատյանը նշեց. «Լավ արեցի, որովհետև հունվարին հայտարարել էի՝ հարձակվում է, մարտին ասում էի՝ ԱԹՍ-ների դեմ ի՞նչ ես անելու, մայիս-հունիսին սկսեցին իսրայելական ՍՍ դրոներն առնել, և այլն: Ասում եմ՝ էս ի՞նչ եք անում, արա, ՕԿԱ-ԱՍԱ՞ եք առնում, չե՞ք հասկանում, որ հարձակվելու է:
Ասեցի՝ 4 ամիս հետո կհարձակվի, հարձակվեց 3 ամիս 27 օր հետո: Ինձ պետք է դրա համար շնորհակալություն հայտնեն»:
Դիտարկմանը, թե Ձեր հայտարարություններին քննադատաբար են մոտենում, Հ․ Բագրատյանն արձագանքեց. «Սամվել Բաբայանի հայտարարություններն է՞լ են քննադատական, որ ԱԹՍ-ներով մեզ սատկացնելու են: Բայրաքթարները սկսել է մայիս-հունիսին առնել. հունիսի 1-ին հայտարարում եմ, ասում եմ՝ դու էս ի՞նչ ես անում, ՕՍԱ-ԱԿԱ ե՞ս առնում. դրանո՞վ ես բայրաքթարի դեմ կռվելու»:
Լրագրողների դիտարկմանը, թե Գլխավոր շտաբի նախկին պետը մինչ այս պահը հիմնավորում է ՕԿԱ-ԱՍԱ համակարգերի գնումը, նա հակադարձեց.
«Գլխավոր շտաբի նախկին պետը գլուխը պատին է տալիս. ինտերնետում հեշտությամբ կարելի է կարդալ՝ ՕՍԱ-ԱԿԱ-ով ինչ կարելի է անել, բայրաքթարով ինչ կարելի է անել: ՕԿԱ-ԱՍԱ-ն բայրաքթարին անհասանելի է»:
Անդրադառնալով Սյունիքում տեղի ունեցող գործընթացներին՝ ՀՀ նախկին վարչապետը նշեց, որ ՀՀ-ից տարածքներ են խլում, ապա կասկած հայտնեց.
«Իրականում Ղարաբաղում մնացել է 2.5 հազար քառ․կմ, Սյունիքից մինչև Տավուշ, ինչպես նաև՝ Նախիջևան՝ տալաշ-տալաշ 2500-ը Ալիևը նաղդ վերցնելու է, որ հետո որոշի՝ Ղարաբաղին ինչ կարգավիճակ տա: Ես կարծում եմ, որ գոյություն ունի այդպիսի հանցավոր գործարք»:
Հրանտ Բագրատյանը հստակեցրեց, որ Սյունիքի վիճահարույց ամբողջ ճանապարհը հայկական է, մինչդեռ հակառակորդը ճանապարհը տեղ-տեղ անցել է և խորացել է դեպի մեր տարածք, վերցրել են Գորիս-Դավիթ Բեկ, Կապան-Ճակատեն հատվածներում:
Դիտարկմանը, թե Գուգլի քարտեզագրմամբ է դա արվում, նա արձագանքեց. «Գուգլը ումի՞ց է վերցրել դա, օդի՞ց է վերցրել, վվոդ ա արել, չէ՞, օպերատորը: Ճանապարհը կառուցվել է Խորհրդային Միության օրոք հայկական ԽՍՀՄ մինիստրների խորհրդի որոշմամբ: Կան ռազմական քարտեզներ:
Գուգլը կաշառքը վերցրել է, գիծը տարել է: Չեք հասկանո՞ւմ էսքան բանը»:
Հրանտ Բագրատյանը նաև հավելեց, որ սահմանները որոշվում են դելիմիտացիայի և դեմարկացիայի արդյունքում. «Դելիմիտացիա արված է, դեմարկացիա չկա: Որպես հիմք՝ ընդունվում են, օրինակ, ռազմական քարտեզները:
Այսինքն՝ այնպես չի, որ ՀՀ սահման չկա, ՀՀ սահման կա, եթե մեկն ասում է՝ ՀՀ սահմանները որոշված չեն, ուրեմն՝ ՀՀ չկա: Եթե սահմանը որոշված չի, ուրեմն երկիր չկա»:
Հարցին՝ եթե Նիկոլ Փաշինյանը չի զբաղվում, այլ կառույց չկա՞, որը կկարողանա այդ հարցը կարգավորել, նա պատասխանեց. «Այս ամեն ինչի պատասխանատուն նաև նախագահն է»:
Նա չի հավատում Արմեն Սարգսյանի այն պարզաբանմանը, թե ինքը տեղյակ չի եղել նոյեմբերի 9-ի հայտարարությունից, «123 հոդվածի համապատասխան՝ ՀՀ տարածքային ամբողջականության երաշխավորը ՀՀ նախագահն է, Նիկոլը չի»:
«Կորոնայով հիվանդ լինելն ի՞նչ կապ ունի. թող ասի՝ համաձայն չեմ, դա ի՞նչ կապ ունի, ինքը չի՞ ասում՝ հեռավար կառավարում եմ: Նա կորոնայով հիվանդ չի, կորոնայով երեք ամիս հիվանդ չեն լինում, մենք էլ ենք հիվանդացել»,- հակադարձեց նա:
ՀՀ նախկին վարչապետը նշում է, որ Նիկոլ Փաշինյանի նշած բանավոր ըմբռնումն ամենևին էլ բանավոր չէ. «Գրավոր թուղթ կա, բանավոր ըմբռնում չկա, լայնությունը, երկայնությունը…: Համաձայնության մեջ վկայակոչված է նոյեմբերի 9-ի համաձայնագիրը, և ասում է՝ ի կատարումն այդ համաձայնագրի»:
Նա հույս ունի, որ ճնշման արդյունքում, հեղափոխությամբ կհասնեն երկրում փոփոխության:
ԱԺ «Իմ քայլը» խմբակցության պատգամավոր «Անդրանիկ Քոչարյանն ԱԺ-ում լրագրողների հետ զրույցում ասել էր, թե Հ․ Բագրատյանը «վտանգավոր հարցազրույցներ է տալիս»։ Այս առնչությամբ Հրանտ Բագրատյանն ասաց. «Երբ Անդրանիկ Քոչարյանին կբռնենք-կնստեցնենք, խելքը գլուխը կգա, Անդո Քոչարյանը, որ մուտիլովկա է անում։ Վտանգավորն իրենք են այն հիմքով, որ ինքը պիտի վեր կենա պառլամենտում ասի՝ հողերս խի՞ եք տալիս, ինչի՞ չի ասում»։
Մանրամասները՝ տեսանյութում
