Արցախի խորհրդարանում թեժ քննարկում է սպասվում. «Հրապարակ»
«Հրապարակ» թերթը գրում է. «Այսօր Արցախի խորհրդարանում թեժ քննարկում է սպասվում` օրակարգում է 2021 թ․ բյուջեի նախագիծը, որը, ընդդիմադիր պատգամավորների հավաստմամբ, որեւէ տողով չի հուշում, որ գործ ունենք հետպատերազմական, խնդիրներով լեցուն Արցախի ֆինանսական փաստաթղթի հետ։
«Որեւէ ծախս չի կրճատվել, որեւէ ոլորտում խնայողություն չի արվել, անգամ ծառայողական ավտոմեքենաների համար նախատեսվող բյուջեն է մնացել նույնը, ինչ նախորդ տարի»,- ասաց մեր աղբյուրը։ Իսկ նախագահականին հատկացվող բյուջեն 200 միլիոն դրամով աճել է՝ հասնելով մոտ 800-ի։
Իհարկե, դա պայմանավորված է նաեւ այն հանգամանքով, որ Պետական վերահսկողական ծառայությունը կառավարության կազմից տեղափոխվել է նախագահի ենթակայության ներքո, սակայն, բացի այդ, նախագահականում խորհրդական, օգնականների թվի կրճատում էլ չի եղել։ «Կյանքը՝ ինչպես պատերազմից առաջ, ասես ոչինչ չի եղել, որից պետք էր հետեւություններ անել»,- ասաց մեր աղբյուրը»:
