«Այսօր ռեստորանում Աշոտ Փաշինյանը Կառավարություն ներխուժած և վարչապետի ցուցանակը պոկած Ալեքսանդր Իսկանդարյանի հետ էր… Երկա՞ր են դեռ ժողովրդին էշի տեղ դնելու…». Նարեկ Մալյան
168.am-ն այսօր գրել էր այն մասին, որ տելեգրամյան ալիքներից մեկը հրապարակել է իր հանգիստը Երևանի սրճարաններից մեկում վայելող վարչապետ Նիկոլ Փաշինյանի որդու՝ Աշոտ Փաշինյանի լուսանկարը:
Լուսանկարը, որում նա միայնակ չէր, վերնագրված էր՝ Այս պահին Սարյան փողոցում:
Մեզ հաջողվել էր պարզել, որ լուսանկարն արված է այսօր, Սարյան փողոցում գտնվող «Տափաստան» սրճարանում:
Մեզ հասած տեղեկություններով՝ վարչապետի որդու հետ սրճարանում պատկերված անձը Ալեքսանդր Իսկանդարյանն է, ով Օպերայի շրջակայքում սրճարան ունի, որը զարմանալիորեն չի քանդվել:
Ըստ օդում կախված լուրերի՝ սույն երիտասարդը եղել է նոյեմբերի 10-ի գիշերը կառավարության շենքում: Թե ինչ է արել նա այնտեղ, կարող ենք միայն ենթադրել:
Լուսանկարը, ի դեպ, վարչապետի խոսնակ Մանե Գևորգյանի հրապարակած տեսանյութից էր արվել:
Թեման զարգացրել է «ՎԵՏՕ» հասարակական-քաղաքական շարժման ղեկավար Նարեկ Մալյանը, ով լուսանկարներ է հրապարակել՝ մեր նյութի իսկությունը փաստող:
«Այսօր Սարյան փողոցի Տափաստան ռեստորանում Աշոտ Փաշինյանը Ալեքսանդր Իսկանդարյանի հետ էր:
Կառավարություն ներխուժած և վարչապետի ցուցանակը պոկած Ալեքսանդր Իսկանդարյանի հետ:
Երկա՞ր են դեռ ժողովրդին էշի տեղ դնելու…»,- ի հավելումն այդ լուսանկարների՝ գրել էր Նարեկ Մալյանն իր ֆեյսբուքյան էջում:
