Արցախ վերադարձողների թիվն աճում է
Նոյեմբերի 14-ից սկսած՝ ամենօրյա գրաֆիկով գործում են Երևան-Ստեփանակերտ անվճար ուղևորափոխադրումներ՝ պատերազմի հետևանքով ՀՀ-ում ապաստանած արցախցիներին տեղափոխելու համար:
«Արցախպրես»-ի թղթակցի հետ զրույցում ՀՀ-ում Արցախի կառավարության օպերատիվ շտաբի տեղեկատվության բաժնի պատասխանատու Անի Ավանեսյանն ասել է, որ այս պահին ուղևորափոխադրումներն իրականացվում են միայն Երևան քաղաքից՝ «Կիլիկիա» կենտրոնական ավտոկայանից, սակայն քննարկվում է նաև ՀՀ մարզերում ժամանակավորապես ապաստանած արցախցիների տեղափոխման հարցը:
Ա. Ավանեսյանի խոսքով՝ երթուղիները կգործեն թերևս այնքան ժամանակ, մինչև դրա կարիքը կլինի։
Ի դեպ, նոյեմբերի 14-ին Արցախ են վերադարձել 250, նոյեմբերի 15-ին՝ 475, նոյեմբերի 16-ին՝ 560, իսկ միայն այսօր՝ 1000-ից ավելի արցախցիներ:
Նա նշել է, որ օրեցօր աճում է վերադառնալ ցանկացող արցախցիների թիվը:
Ինչ վերաբերում է ՀՀ-ում ապաստանած այն արցախցիներին, որոնց բնակավայրերը հայտնվել են թշնամու վերահսկողության տակ, Ա. Ավանեսյանը հայտնել է, որ նրանց կտրամադրվեն կացարաններ ինչպես մայրաքաղաք Ստեփանակերտում, այնպես էլ հարակից բնակավայրերում: Այդ մասին Արցախի կառավարությունը շուտով հանդես կգա մանրամասն տեղեկատվությամբ՝ համապատասխան գերատեսչությունների միջոցով լուծումներ տալով պատերազմի պարտադրած ծանր խնդիրներին։
