Ռուսաստանն ու Թուրքիան ԼՂ-ում համատեղ կենտրոն ստեղծելու մասին հուշագիր են ստորագրել
Թուրքիայի նախագահ Ռեջեփ Թայիբ Էրդողանն այսօր հայտարարել է, որ Անկարան ու Մոսկվան ստորագրել են հուշագիր ռուս-թուրքական համատեղ կենտրոն ստեղծելու մասին, որը պետք է վերահսկի ԼՂ-ում հրադադարի ռեժիմը։ Տեղեկությունը փոխանցում է ռուսական ՏԱՍՍ գործակալությունը։ Ըստ Թուրքիայի նախագահի՝ Լեռնային Ղարաբաղում կրակի դադարեցման ռեժիմի վերահսկողության և մոնիտորինգի թուրք-ռուսական կենտրոնի ստեղծման մասին հուշագիրը ստորագրվել է այսօր առավոտյան։ Էրդողանը նաև հույս է հայտնել, որ ինչպես Սիրիայում, այնպես էլ ԼՂ հարցում կապահովվի արդարացի խաղաղություն։
«Թուրքիան Ռուսաստանի հետ ավելի սերտ համագործակցության է պատրաստ Սիրիայի ապագայի հարցում»,- ասել է նա։
Բացի դրանից, Էրդողանը պնդել է, որ Թուրքիան Ռուսաստանի հետ համատեղ Ղարաբաղում խաղաղապահների հարցում իր տեղը կունենա։
