«Մի հատ էդ ասողներին նայեք․ որ իրենց թողես՝ իրենք փոքր դիկտատորներ են իրենց տեղերում»․ Հովհաննես Հովհաննիսյան
ԱԺ «իմ քայլը» խմբակցության պատգամավոր Հովհաննես Հովհաննիսյանն այսօր ԱԺ արտահերթ նիստի ժամանակ ասաց, թե կորոնավիրուսից ավելի վտանգավոր է այն մանիպուլյացիան, որն ըստ նրա կա թե՛ խորհրդարանի դահլիճում, թե՛ այնտեղից դուրս։
«Այդ մանիպուլյացիան դրսևորվում է տարբեր ձևերով։ Առանց օրինագիծը կարդալու՝ վերցնում ու հետևություններ են անում։ Ես երեկ ունեցել եմ մտահոգություններ, հետո պարոն Ավինյանը եկել է, մոտ ժամ լսել ենք իր բացատրությունները՝ բավականին հիմնավոր։
Վաղը-մյուս օրը, որ երկրում ստեղծվի առողջապահական վատ վիճակ, գալու եք ասեք՝ կառավարություն, խի՞ քայլ չէիր ձեռնարկում։ Հիմա կառավարությունն ասում ՝ ինձ տվեք այս գործիքը, գնամ հետագծերը հայտնաբերեմ։ Մենք ասում ենք՝ տվյալների հետ կապված ունենք խնդիր, մտահոգություն, որը պետք է փարատվի, դրա համար առաջարկում ենք, որ ընդդիմության ներկայացուցիչներից պարտադիր մարդիկ ընդգրկվեն և այդ մարդիկ ներկա լինեն տվյալների ոչնչացմանը՝ իրենց մասնագետներով։ Նաև առաջարկել ենք՝ հասարակական սեկտորի և կազմակերպությունների ներգրավում։ Բանավոր համաձայնություն է եղել, որ կառավարության կարգում, որը պետք է լինի, այս հարցերի պատասխանները տրվեն, որ որևէ մեկի մոտ բաց հարց չմնա»,-ասաց նա։
Ինչ վերաբերում է ժողովրդավարության վերաբերյալ ընդդիմադիր խմբակցությունների պատգամավորների մտահոգություններին, նա ասաց․ «Մի հատ էդ ասողներին նայեք․ որ իրենց թողես՝ իրենք փոքր դիկտատորներ են իրենց տեղերում։ Ասենք, հերիք է, էլի, նման բաներ խոսել»։
