«Բարսելոնան» կարող է հրաժարվել Վիդալից կամ Ռակիտիչից
«Բարսելոնայի» գլխավոր մարզիչ Էռնեստո Վալվերդեն նշել է, որ կիսապաշտպաններ Իվան Ռակիտիչը և Արթուրո Վիդալը պետք է պայքարեն մեկնարկային կազմում տեղ ունենալու համար: Ըստ իսպանական լրատվամիջոցների՝ կա՛մ Վիդալը, կա՛մ Ռակիտիչը կարող են հեռանալ կատալոնական ակումբից:
Ֆրենկի դե Յոնգի՝ կատալոնական ակումբ տեղափոխվելուց հետո այս ֆուտբոլիստները չեն տեղավորվում Վալվերդեի մարտավարությունում:
Մասնագետները նշում են մի քանի տարբերակ, որոնց միջոցով Վիդալն ու Ռակիտիչը կարող են խաղալ դե Յոնգի հետ:
Արթուր-դե Յոնգ-Ռակիտիչ
Այս կոմբինացիայի դեպքում Արթուրն ու Ռակիտիչը կխաղան իրենց համար սովորական դիրքերում, իսկ դե Յոնգն ավելի շատ կգործի պաշտպանական գծում: Սա թույլ կտա Բուսկետսին ավելի շատ հանգստանալ և ամբողջ մրցաշրջանի ընթացքում լինել լավ մարզավիճակում:
Կոուտինիո-դե Յոնգ-Վիդալ
Սա շատ լավ եռյակ է այն դեպքում, երբ Վալվերդեն որոշի ռոտացիա իրականացնել: Արթուրո Վիդալը շատ լավ օգնում է թիմին՝ խլելով գնդակներ: Առանց նրա՝ կատալոնացիների ֆուտբոլիստները ստիպված են ակտիվ պրեսինգի դիմել գնդակը խլելու համար:
Այս սխեմայի դեպքում Կոուտինիոն և Ֆրենկին կաշխատեն տանդեմում, որպեսզի խլեն գնդակը մրցակցից և ստեղծեն գոլային դրվագներ: Հոլանդացին հետ կմնա, իսկ Վիդալը կգնա առաջ:
Արթուրո Վիդալի ծառայություններով հետաքրքրվում են իտալական ակումբները: Լավ առաջարկի դեպքում, հնարավոր է, նա փոխի ակումբային գրանցումը:
Իվան Ռակիտիչը հեռանալ չի ցանկանում: Սակայն նա կարող է դառնալ Նեյմարի՝ ՊՍԺ-ից կատալոնական ակումբ տեղափոխվելու գործարքի մաս:
Սիրարփի Աղաբաբյան
