Վրաստանը միջազգային հանցագործների կընդունի իր բանտերում
Վրաստանի արդարադատության նախարարությունը եւ Հաագայի Միջազգային քրեական դատարանը համաձայնագիր են ստորագրել Հաագայի դատարանի վճիռներն ի կատար ածելու վերաբերյալ, այսինքն՝ միջազգային հանցագործները կկարողանան պատիժը կրել Վրաստանում:
Այդ մասին ասված է արդարադատության նախարարության կայքում զետեղված հաղորդագրության մեջ: Նշվում է, որ այս փուլում Հաագայի դատարանի կողմից դատապարտվածների փոքր թվաքանակի պատճառով անհրաժեշտություն չկա օգտագործել վրացական բանտերը:
«Իրադրության փոխվելու դեպքում Վրաստանի պատժական համակարգն արդեն կկարողանա օգնել Միջազգային քրեական դատարանին եւ դատապարտյալներին ընդունել իր տարածքում»,-ասված է հաղորդագրության մեջ: Հաագայի դատարանն ավելի վաղ նմանօրինակ համաձայնագրեր է ստորագրել Ավստրիայի, Բելգիայի, Դանիայի, Նորվեգիայի, Սերբիայի, Շվեդիայի, Սլովենիայի եւ Մեծ Բրիտանիայի հետ, հաղորդել է Sputnik-ը:
