«Սևիլիա»-«Բարսելոնա». Հավանական եզրափակիչը՝ քառորդ եզրափակչում

Իսպանիայի գավաթի քառորդ եզրափակչի «Սևիլիա»-«Բարսելոնա» հանդիպումն արժանի է եզրափակչին: Այս դիմակայությունը մասնագետները պատրաստվում էին դիտել վերջին խաղում՝ հաշվի առնելով, թե ինչպես են հանդես գալիս թիմերն այս մրցաշրջանում, սակայն մրցակիցներից մեկը պետք է լքի պայքարն արդեն իսկ այս փուլում:

«Սևիլիա»

«Սևիլիան» այս պահին ոչ այնքան լավ շրջանում է:

Վերջին տուրում ակումբը պարտվեց «Ռեալ Մադրիդին» «Սանտյագո Բեռնաբեու» մարզադաշտում՝ 2:0 հաշվով: Այս պարտությունը բարդացրեց սևիլիական ակումբի վիճակը մրցաշարային աղյուսակում:

«Սևիլիան» նահանջեց երկրորդ հորիզոնական՝ զիջելով մադրիդյան ակումբին 3 միավոր: 5-րդ և 6-րդ տեղերը զբաղեցրած թիմերը՝ «Ալավեսը» և «Խետաֆեն», հետ են մնում շատ փոքր տարբերությամբ:

Մադրիդյան ակումբից կրած պարտությունը երրորդ անընդմեջ պարտությունն էր «Սևիլիայի» համար պաշտոնական խաղերում: Մադրիդցիների հետ խաղից առաջ «Սևիլիան» երկու անգամ պարտվել էր Բիլբաոյի «Ատլետիկին»՝ 0:2՝ Պրեմիերայում, և 0:1՝ գավաթում:

«Սևիլիայի» կազմում վնասվածքներ ունեն Մակսիմ Գոնալոն և Մանուել Նոլիտոն: Վնասվածք է ստացել նաև թիմի նորեկը՝ Մունիր Էլ-Հադդադին, ով տեղափոխվել էր կատալոնական ակումբից:

«Բարսելոնա»

Կատալոնական ակումբն իր վերջին հանդիպումը  հաղթեց՝ ոչ այնքան հեշտ պայքարում հաղթահարելով «Լեգանեսի» արգելքը՝ 3:1: Այս հաղթանակն օգնեց կատալոնական ակումբին պահպանել Մադրիդի «Ատլոտիկոյի»  նկատմամբ  5 միավորի առավելությունը:
Սա կատալոնական ակումբի երրորդ անընդմեջ հաղթանակն էր:

Իպանիայի գավաթի 1/8 եզրափակչում կատալոնացիները մրցում էին «Լեգանեսի» հետ, որին կարողացան հաղթել միայն երկրորդ խաղում՝ 3:1: Առաջին խաղում Էռնեստո Վալվերդեի սաները պարտվել  էին 1:2 հաշվով:

Կատալոնական ակումբում վնասվածքներ ունեն Սամուել Ումտիտին և Ռաֆինյա Ալկանտարան:

Վիճակագրություն և անձնական հանդիպումներ

• «Սևիլիան» պարտվել է վերջին 3 պաշտոնական հանդիպումներում՝ չխփելով ոչ մի գնդակ
• Սեփական հարկի տակ «Սևիլիան» հաղթել է 12 խաղերից 10-ում
• «Բարսելոնան» հաղթել է վերջին 12 պաշտոնական խաղերից 10-ում
• Մրցակցի հարկի տակ«Բարսելոնան» պարտվել է 11 պաշտոնական խաղերից միայն 1-ում
• «Բարսելոնան» հաղթել է «Սևիլիային» վերջին 11 խաղերից 10-ում

«Սևիլիան» խաղից առաջ ունի հսկայական մոտիվացիա: Գարնանը թիմը ջախջախիչ պարտություն կրեց նույն կատալոնացիներից՝ զիջելով 5:0 հաշվով: Դրանից հետո  «Սևիլիան»  պարտվեց կատալոնացիներին Սուպերգավաթում՝ 1:2, ինչպես նաև այս մրցաշրջանի սկզբում՝ 2:4:

Պետք է նշել, որ «Սևիլիան» բավականին վստահ է խաղում սեփական հարկի տակ: Այնպես որ, «Սևիլիան» ամեն ինչ անելու է սեփական հարկի տակ գոնե չպարտվելու համար;

Իսպանիայի գավաթի ¼ եզրափակչի խաղը կկայանա կեսգիշերն անց՝ ժամը 00:30-ին:

Սիրարփի Աղաբաբյան