Թրամփին անվանակարգել են «Ոսկե ազնվամորի» մրցանակի
ԱՄՆ-ի նախագահ Դոնալդ Թրամփն անվանակարգվել է «Ոսկե ազնվամորի» մրցանակի, որը նշում է ամենավատ աշխատանքները կինոյի բնագավառում: Անվանակարգորդների ցուցակը հունվարի 21-ին զետեղված է հակապարգեւի կայքում։
Սպիտակ տան ղեկավարը կարող է «Վատագույն դերասան» կատեգորիայում մրցանակի դափնեկիր դառնալ ռեժիսոր Դինեշ դ՛Սոուզայի «Ազգի մահը» եւ ռեժիսոր Մայքլ Մուրի «Ֆարենհեյթ 11/9» վավերագրական կինոնկարներում իր հայտնվելու համար: Թրամփի մրցակիցները կլինեն դերասաններ Ջոնի Դեփը («Շեռլոք Գնոմս»), Ուիլ Ֆարելը («Հոլմս & Վաթսոն»), Ջոն Տրավոլտան («Գոթիի օրենսգիրքը») եւ Բրյուս Ուիլիսը («Մահվան ծարավ»): Միացյալ Նահանգների ղեկավարը եւ «նրա անփոփոխ մանրախնդրությունը» նաեւ անվանակարգվել են «Վատագույն դերասանական դուետ» կատեգորիայում:
«Ոսկե ազնվամորի» ստանալուն հավակնում է նաեւ ԱՄՆ-ի առաջին տիկինը՝ Մելանյան: Թրամփի կինը «Երկրորդ պլանի վատագույն դերասանուհի» կատեգորիայում անվանակարգվել է «Ֆարենհեյթ 11/9»-ի համար: Ինչպես նշում է The Hollywood Reporter հանդեսը, ԱՄՆ-ի ներկայիս նախագահն արդեն «Ոսկե ազնվամորի» մրցանակի դափնեկիր է «Երկրորդ պլանի վատագույն դերասան» կատեգորիայում. նախագահն այն ստացել է «Ուրվականները դա չեն անում» (1989 թ.) ֆիլմի համար:
«Ոսկե ազնվամորու» 39-րդ մարցանակաբաշխությունը տեղի կունենա փետրվարի 23-ին՝ «Օսկար» կինոմրցանակի հանձնումից մեկ օր առաջ, հաղորդել է ՏԱՍՍ-ը:
