Ինչպես բարելավել հիշողությունը և ուղեղի աշխատանքը
Մի խումբ ամերիկացի հետազոտողներ պարզել են, որ ֆիզիկական ակտիվությունը, այդ թվում՝ զբոսանքները կամ տնային գործերը, օգնում են բարելավելու հիշողությունը եւ գլխուղեղի կոգնիտիվ այլ գործառույթներ: Գիտնականների եզրակացություններին կարելի է ծանոթանալ EurekAlert! պորտալում հրապարակված մամուլի տեղեկագրում:
Հետազոտությանը մասնակցել է 454 մարդ, այդ թվում՝ 191 դեմենցիայով տառապող: Կամավորներն անցել են ֆիզիկական ուժի թեստավորում, նաեւ գնահատվել է նրանց մտածողությունը եւ հիշողությունը 20 տարվա ընթացքում: Գիտափորձի բոլոր մասնակիցները համաձայնել են իրենց մահից հետո նվիրաբերել իրենց ուղեղները վերլուծության համար:
Միջին հաշվով կյանքից հեռանալուց երկու տարի առաջ հետազոտության մասնակիցներից յուրաքանչյուրն ստացել է դաստակին հագցվող աքսելերոմետր: Սարքը շուրջօրյա հսկել է ֆիզիկական ակտիվությունը, ինչպես նվազագույն (տեղաշարժումներ տանը), այնպես էլ ավելի եռանդուն շարժումները՝ վարժությունները: Պարզվել է, որ նրանք, ովքեր նստակյաց կյանք են վարել, ավելի հաճախ են տառապել թուլամտությունից եւ ավելի վատ են անցել հիշողության եւ մտածողության թեստերը, հաղորդել է ՌԻԱ Նովոստին:
