ՄԻՊ մարզային այցի ընթացքում Բաղանիս և Կոթի գյուղերի բնակիչների բարձրացրած խնդիրները պաշտպանը ամփոփել և ներկայացվել է կառավարություն
Մարդու իրավունքների պաշտպանի մարզային այցի ընթացքում Բաղանիս և Կոթի գյուղերի բնակիչների բարձրացրած խնդիրները Պաշտպանի կողմից ամփոփվել և ներկայացվել են Կառավարություն։ Դրա հիման վրա հոկտեմբերի 24-ին տեղի է ունեցել աշխատանքային քննարկում:
Ինչպես տեղեկացրին ՄԻՊ աշխատակազմի հանրային կապերի բաժնից, տարածքային կառավարման և զարգացման նախարարի տեղակալ Կարեն Իսախանյանի և Մարդու իրավունքների պաշտպանի աշխատակազմի քաղաքացիական, սոցիալ-տնտեսական և մշակութային իրավունքների պաշտպանության դեպարտամենտի ղեկավար Արմեն Մաշինյանի մասնակցությամբ քննարկմանը ներկա են եղել Էներգետիկ ենթակառուցվածքների և բնական պաշարների, Բնապահպանության, Գյուղատնտեսության նախարարությունների, Սոցիալական ապահովության պետական ծառայության ներկայացուցիչներ, ինչպես նաև Անտառային կոմիտեի նախագահի պաշտոնակատարը, Տավուշի փոխմարզպետն ու Նոյեմբերյան համայնքի ղեկավարը։
Մարդու իրավունքների պաշտպանի աշխատակազմը ներկայացրել է Բաղանիս և Կոթի գյուղերի բնակիչների բարձրացրած խնդիրները՝ կապված բնակելի տները գազիֆիկացնելու համար սոցիալական աջակցություն ստանալու, անվճար կամ արտոնյալ պայմաններով հատկացվող վառելափայտի չափաքանակն ավելացնելու, անտառափայտի իրացումն իրականացնող կազմակերպության կողմից սահմանամերձ շրջանների բնակչության համար վառելափայտի համար սահմանված սակագինը վերանայելու հետ և այլն:
Մի շարք կոնկրետ խնդիրների կապակցությամբ արդեն իսկ նախանշվել են լուծումներ, իսկ համակարգային խնդիրների հետ կապված կնախաձեռնվեն առանձին քննարկումներ:
Մարդու իրավունքների պաշտպանը կարևորում է Տարածքային կառավարման և զարգացման նախարարության քայլերը նշված քննարկման ու լուծումների հարցում իր իրավասության սահմաններում աջակցելու համար:
