Լսեք օրգանիզմին՝ հասկանալու համար, թե ինչ է նրան անհրաժեշտ

Բերանում հաճախ եք չորություն զգում, բայց առանց դրան ուշադրություն դարձնելու՝ պարզապես հագեցնո՞ւմ եք ծարավը: Estet-portal.com-ի հաղորդմամբ՝ այսպիսի վարվելակերպը կարող է իսկապես վնասել առողջությանը, քանի որ օրգանիզմը հաճախ է ազդանշաններ ուղարկում, որոնք հնարավորություն են տալիս ժամանակին հասկանալ խնդիրն ու հոգ տանել առողջական վիճակի մասին:

Ճաքեր շուրթերին և փառ լեզվին

Շուրթերին ճաքեր նկատելու դեպքում ուշադրություն դարձրեք՝ արդյոք առկա են մազաթափություն և կենտրոնանալու դժվարություններ: Այս ախտանշանների համադրությունը վկայում է վիտամին B2-ի անբավարար մակարդակի մասին: Սննդակարգ ներառեք սոյա, կաթ, ձու, ծաղկակաղամբ, կեֆիր, լոլիկ:

Լեզվին սպիտակ փառի առկայությունը վկայում է վատ սնվելու կամ մրսածության մասին, իսկ եթե սպիտակ ֆոնին լեզվի ծայրերին առկա է նաև կարմրածություն, խնդիրը կարող է գաստրիտը լինել:

Եթե փառը մոտ է մոխրագույնին, ուշադրություն դարձրեք նյութափոխանակության համակարգի օրգանների աշխատանքին:

Եթե այս ամենն ուղեկցվում է մաշկի չորությամբ և շուրթերի այտուցվածությամբ, օրգանիզմին չի բավարարում երկաթի մակարդակը: Սննդակարգ ներառեք խնձոր, ցիտրուսային մրգեր, ձուկ, լյարդ, որոշ ժամանակով հրաժարվեք սուրճից:

Ուշադրություն դարձրեք բերանի խոռոչի վիճակին

Սթրեսային իրավիճակներում բերանում չորություն զգալը նորմալ է: Եթե պարբերաբար այսպիսի զգացում եք ունենում, այն ուղեկցվում է գրգռվածությամբ, ամենայն հավանականությամբ օրգանիզմը բավարար քանակով նիկոտինային թթու չի ստանում: Սննդակարգ ներառեք թռչնամիս, ընդեղեն, տավարի միս: Բերանում չորության զգացումը կարող է վկայել նաև շաքարային դիաբետի մասին:

Բերանում տհաճ հոտի առկայությունը կարող է վկայել մի խումբ առողջական խնդիրների մասին, այդ թվում՝ լյարդի հետ կապված խնդրի, քրոնիկ բրոնխիտի, ատամների և լնդերի հիվանդությունների մասին:

Կոպերի այտուցվածություն

Այս խնդիրը դեպքերի մեծամասնությունում վկայում է երիկամների խնդիրների մասին:

Եթե առկա է տհաճ զգացողություն վառ լույսի դեպքում, հյուծվածություն, մաշկի չորութուն, հարկավոր է ուշադրություն դարձնել վնասակար սովորություններին: Հրաժարվեք ծխախոտից և ալկոհոլից: Եթե վնասակար սովորություններ չունեք, այս ախտանշանները կարող են վկայել ալերգիայի մասին:

Վառ լույսի դեպքում անհարմարության զգացումը շատ դեպքերում վկայում է A վիտամինի անբավարար մակարդակի մասին: Սննդակարգ ներառեք պանիր, գազար, լոլիկ:

Բշտիկներ դեմքին

• Դեմքին մանր, կարմրավուն բշտիկների առկայությունը կարող է վկայել թոքերում լորձի կուտակման մասին:
• Թարախով լցված բշտիկների առաջացումը կարող է կապված լինել աղիների խնդիրների հետ:
• Քունքերի հատվածում բշտիկների առաջացումը խոսում է լյարդի և ենթաստամոքսային գեղձի խնդիրների առկայության մասին:
• Գլխի հատվածում և ճակատին առաջացող բշտիկները կարող են վկայել որովայնի հետ կապված խնդիրների մասին:

Մաշկի թեփոտում և լիմֆատիկ հանգույցների մեծացում

Ձմեռային եղանակին մաշկի թեփոտումը նորմալ է և կապված է ջերմաստիճանի անկման հետ: Մյուս դեպքերում այս երևույթը կապված է A և B2 վիտամինների անբավարար մակարդակի հետ: Լիարժեք սննդակարգը կօգնի ազատվել մաշկային խնդիրներից: Եթե թեփոտումն ուղեկցվում է նաև քորով, դիմեք մասնագետի. ամենայն հավանականությամբ, խնդիրը սնկային վարակն է:

Լիմֆատիկ հանգույցների մեծացումը վկայում է օրգանիզմում բորբոքային գործընթացների մասին, ինչը չի կարելի անուշադրության մատնել: Այդ դեպքում խնդիրը կարող է ավելի խորանալ:

Այտուցներ

• Արթնանալուց անմիջապես հետո դեմքին այտուցների առկայությունը կարող է վկայել երիկամների առողջության հետ կապված խնդիրների մասին: Սովորաբար դրանք երեկոյան արդեն անհետանում են:
• Երեկոյան ժամերին որովայնի հատվածում այտուցների առկայությունը սովորաբար վկայում է սրտի հետ կապված խնդիրների մասին, հատկապես, երբ ուղեկցվում է շնչահեղձությամբ և շուրթերի այտուցվածությամբ:

Նյութը հրապարակման պատրաստեց 168.am-ը