Ի՞նչ է ասել Մերկելը Արցախի հակամարտության մասով. պարզաբանում է ԱԳՆ-ն
ԱԳ նախարարության խոսնակի ժամանակավոր պաշտոնակատար Աննա Նաղդալյանն այսօր լրագրողների հետ հանդիպման ընթացքում անդրադառնալով Գերմանիայի կանցլեր Անգելա Մերկելի այցին, և ասաց, որ ձեռք են բերվել հստակ պայմանավորվածություններ, որոնք վերաբերում են և՛ ներդրումներին, և՛ համատեղ ծրագրերին։
«Այս ուղղությամբ հայկական կողմը ներկայացնելու է հստակ առաջարկություններ և ծրագրեր, հանձնառու է եղել այս գործին։ Այցի շրջանակներում քննարկվել է ՀՀ-ԵՄ համաձայնագրի հարցը, վիզաների ազատականացման հարցը, և ստացել ենք գերմանական կողմի հստակ հավաստիացումները»,- ասաց նա։
Ինչ վերաբերում է արցախյան հակամարտությանը, նա ասաց, որ Գերմանիան շահագրգռված է տարածաշրջանում խաղաղության և կայունության հաստատմամբ. «Իսկ դրան հասնելու բանալին խաղաղությանը նպաստող միջավայրի ձևավորումն է։ Ադրբեջան-Արցախ շփման գծի, հայ-ադրբեջանական սահմանագծի երկայնքով իրավիճակի սրումը, պատերազմի քարոզչությունը, այլատյացության սերմանումը, մարդկանց միջև շփումների արգելումը պետք է հստակորեն մերժվեն։
Բաքվում կանցլեր Մերկելը շեշտել է նաև մեկ կարևոր հանգամանք, որ պետք է հակամարտության գոտում բնակվող մարդկանց խնդիրներին լուծումներ տրվեն։ Սրանք այն ուղերձներն են, որոնք Մերկելը ներկայացրել է հակամարտության մասով»։
