Գերմանիայում ձերբակալված իսլամիստը ցանկանում էր ահաբեկչություն իրականացնել որևէ մարդաշատ վայրում
Գերմանիայում երկու ամիս առաջ ձերբակալված թունիսցին ծրագրում էր ահաբեկչություն իրականացնել պայթուցիկ սարքի միջոցով։ Ինչպես փոխանցում է ՏԱՍՍ-ը, այս մասին հայտնել են Գերմանիայի Դաշնային Հանրապետության գլխավոր դատախազությունից:
Հետաքննության վարկածով՝ ենթադրյալ իսլամիստը սկսել է կազմել Գերմանիայում տարածքում ահաբեկչության ծրագիրը 2018-ի գարնանից: «Նա ցանկանում էր գործի դնել թունավոր նյութով` ռիցինով, լցված պայթուցիկ սարքը որևէ փակ մարդաշատ վայրում: Դեռևս հայտնի չէ, թե նա հասցրել էր ընտրել կոնկրետ նշանակետ (հարձակման համար)»,-ասված է հաղորդագրության մեջ: Դատախազությունը չի մանրամասնել, թե որն է «Փակ մարդաշատ վայրը»: Այս գործով ևս երկու կասկածյալ ձերբակալվել է Թունիսում:
