«Մեսսիի և Ռոնալդուի միջև ես միշտ ընտրում եմ Մեսսիին, առանց կասկածի». Սիմեոնե
Մադրիդի «Ատլետիկոյի» գլխավոր մարզիչ Դիեգո Սիմեոնեն մեկնաբանել է Արգենտինայի ազգային հավաքականի առաջատար Լիոնել Մեսսիի հասցեին հնչեցրած քննադատական խոսքերն այն բանից հետո, երբ արգենտինացիները դուրս են մնացել 2018 թ. Աշխարհի գավաթի խաղարկությունից:
«Այն, ինչ կատարվում է հիմա հավաքականում, կատարվում է արդեն 4 տարի՝ անարխիա, ոչ մի վերահսկողություն ֆեդերացիայի կամ այլ պատասխանատու անձի կողմից:
Ես տեսնում եմ կորած հավաքականի: Նրանք պետք է խաղը սկսեին այնպես, ինչպես սկսեցին Իսլանդիայի հետ: Թիմը վատ վիճակում է:
Շատ օգտակար է տեսնելը, թե որքան լավն է Մեսսին, բայց նա լավն է, որովհետև լավ թիմակիցներ ունի»,- նշել էր Սիմեոնեն:
Բացի այդ, 48-ամյա մասնագետը քննադատել էր Մեսսիին ընկերական միջավայրում: Մասնագետի խոսքերի ձայնագրությունը WhatsApp-ի միջոցով հայտնվել է համացանցում: Ձայնագրությունում լսվում է, որ Սիմեոնեն ասում է, որ Մեսսին առանց իր թիմակիցների այնքան էլ լավ չի խաղում, և ինքն իր թիմի համար կընտրեր Ռոնալդուին:
Միջազգային Չեմպիոնների գավաթի խաղարկության նախօրեին կայացած մամուլի ասուլիսում լրագրողները Սիմեոնեին խնդրել են մեկնաբանել իր խոսքերը:
«Մեսսիի և Ռոնալդուի միջև ես միշտ ընտրում եմ Մեսսիին, առանց կասկածի:
Երբ ես ասում էի այդ խոսքերը Մեսսիի և Ռոնալդուի մասին, ես նկատի չունեի աշխարհի լավագույն խաղացողին: Ես ուղղակի նշել եմ, որ միջին խաղացողներով թիմի համար Ռոնալդուն, հավանաբար, ավելի լավ է խաղում:
Սակայն, լավագույն ֆուտբոլիստներով շրջապատված լինելու դեպքում, Մեսսին լավագույնն է»,- նշել է Սիմեոնեն:
Սիրարփի Աղաբաբյան
