Մեքենան գլորվել է ձորը և այրվել. կան տուժածներ
Հուլիսի 27-ին՝ ժամը 17:58-ին, «911» ծառայությանն ահազանգ է ստացվել, որ Վայոց ձորի մարզի Ելփին գյուղի սկզբնամասում տեղի է ունեցել ՃՏՊ՝ հրդեհի բռնկմամբ, կան տուժածներ. անհրաժեշտ է փրկարարների օգնությունը:
Դեպքի վայր են մեկնել ՀՀ ԱԻՆ ՓԾ հրշեջ-փրկարարական ջոկատից մեկ մարտական հաշվարկ և մարզային ճգնաժամային կառավարման կենտրոնի օպերատիվ խումբը:
Պարզվել է, որ Երևան-Մեղրի (Մ-2) ավտոճանապարհի 100-րդ կմ-ին «Toyota» մակնիշի ավտոմեքենան (վարորդը՝ Ա. Ա., ծնված 1991 թ.) դուրս է եկել ճանապարհի երթևեկելի հատվածից, գլորվել ձորը և բռնկվել:
Մինչ փրկարարների՝ կանչի վայր հասնելը ուղևորը (Ա. Վ., ծնված 1987 թ.) և վարորդը տարբեր աստիճանի այրվածքներով հոսպիտալացվել են Եղեգնաձորի ԲԿ, որտեղ բժիշկները տուժածների առողջական վիճակը գնահատել են միջին ծանրության:
Հրդեհը մեկուսացվել է ժամը 18:31-ին, մարվել՝ 18:38-ին: Ամբողջությամբ այրվել է Ա. Վ.-ին պատկանող «Toyota» մակնիշի ավտոմեքենան:
